Foto: Rinat Zaitov Instagram akkaýntynan
Májilis depýtaty Rinat Zaitov memlekettik organdardyń basshylaryn synǵa aldy. Bul týraly "Ult Aqparat" habarlaidy.
Zaiytov memlekettik organdardyń basshylary jáne olardyń orynbasarlary tiisti memlekettik organnyń basshysy bekitetin qabyldaý kestesine sáikes aiyna keminde bir ret azamattardy jáne zańdy tulǵalardyń ókilderin, onyń ishinde osy organdardyń qyzmetkerlerin jeke qabyldaýdy júrgizýge mindetti ekenin eske saldy.
"Sonda, jalǵyz balasy jalamen sottalǵan ana, jarynyń jumbaq qazasy, jyldap tergelmegen áiel, áskerdegi uly múgedek bolyp qalǵan áke, kásibinen zańsyz aiyrylǵan kásipker, jalǵyz baspanasy alaiaqtarǵa qoldy bolǵan otbasy, sot sheshimin oryndata almai júrgen jábirlenýshiler t.s.s. myńdaǵan qorǵansyz halyq ádildikti qaidan tappaq? Bilseńizder aityńyzdarshy! Qazaqta: «Baidy qudai urarda – bailyǵyna mas bolar, Bidi qudai urarda – buqaraǵa qas bolar" - degen eskertý bar. Halyqtan qashpańyzdar", - dedi depýtat.
Májilis depýtaty Qazaqstan Respýblikasynyń Bas prokýrory Berik Asylovqa atalǵan laýazymdy tulǵalar men halyqtyń arasynda kedergisiz bailanys ornatý joldaryn qarastyrýdy jáne azamattardyń aryzdary syrǵytpa jaýap (otpiska) deńgeiinde qalmaýyn qadaǵalaý júiesimen qamtamasyz etýdi talap etti.
"Tipti bolmasa, depýtattardyń esigi kórinbeitin kabinetterge eldiń ótinishin jetkizýge múmkindik berýlerińizdi Qazaqstan Respýblikasy Parlamenti májilisi reglamentiniń 11-taraý 149-tarmaǵyna sáikes talap etemin!" - dedi depýtat Zaitov.
