"Men qazaqpyn myń ólip, myń tirilgen" degen joldy tamyry tereńge jaiylǵan tarihymyzda basymyzǵa túsken qasiretten aman shyqqanymyz úshin aitylǵan dep túsinýshi edim buǵan deiin.
Ǵasyrlar ishinde emes, shirigen rejim, shúkirshil qoǵam jaǵdaiynda 30 jylda-aq myń ólip, myń tirile beredi ekensiń.
Jańaózende halyqty atqanda, bir óldik, tyrtyǵy qalsa da, jarany amaldap jazýǵa tyrystyq.
Ulan-baitaq jeri bar memlekette oryn taba almai, shekara asyp jatqan baýyrlarymyzǵa qarap, taǵy óldik, tirshilik qylý kerek bolǵan soń, kúnde tirilýge májbúrmiz.
Buryn-sońdy tarihymyzda bolmaǵandai, qazaq qandasyn dini ekstremizm jolynda mert qylǵanda da óldik, jan baǵý kerek, kóz jumdyq, ary qarai júrdik.
Óz jerinde kúnin kóre almai júrgen qazaq, amal neshik, aýzyńa qarap otyrǵan balalaryń otyr, janymyzdy oramalǵa túidik te, súireleńdep kelemiz.
Keshe Denis Tendi pyshaqtaǵanda janymyzdy sýyryp alǵandai boldy, jyladyq, qaiǵyrdyq, budan da óttik.
Bul joly da ishimizde birnárse úzildi, qabyrǵamyz qaiysty, kesheden beri kózimnen jas keter emes. Perishtelerdiń ólimine meniń de kinám bar. Úndemedik, qarsy aitpadyq, qoryqtyq. Áli de qorqyp kelemiz. Shirigen bilik aza tutý kúnin jariialaýǵa bara almai tur. Bul joly da óldim, ishimde endi úmit tirile qoimas.
Qudai pák jandaryńdy bizdiń tozaqqa qiia almai alǵan shyǵar. Keshirińder bizdi. Jandaryń jannata bolsyn.
Baqytjan Buqarbaidyń feisbýktaǵy jazbasynan
