2015 jyldan beri iske asyrylyp kele jatqan «Myń bala» respýblikalyq jobasynyń aiasynda 280 myń jetkinshek qazaq tilin úirenýge tartylǵan, dep habarlaidy QazAqparat.
Bul týraly QR Aqparat jáne áleýmettik damý vitse-ministri Serik Egizbaev Qazaqstan halqy Assambleiasy uiymdastyrǵan Prezident Joldaýyna arnalǵan dóńgelek ústelde aitty.
«Elimiz boiynsha barlyǵy 174 jeksenbilik mektep jumys atqarady, onyń ishinde 124 top qazaq tili kýrstaryn ótkizedi. Oǵan 1200-ge jýyq adam qatysady.
Sonymen qatar, Dostyq úileriniń bazasynda turaqty negizde qazaq tilin oqytý boiynsha «Mámile» atty 18 pikirtalas klýby uiymdastyryldy, «Qazaqtaný» respýblikalyq mádeni-aǵartýshylyq jobasy iske asyrylady», - dedi vedomstvo ókili.
Sondai-aq, ol ministrlik «Qazaqstandyq etnostardyń alýan túrliligin rýhani-mádeni tanymal etý» jobasyn iske asyryp jatqanyn aitty.
«Bul joba qazaq halqynyń salt-dástúrleri men ádet-ǵuryptaryn zerdeleýge, qazaq tili men Qazaqstan etnostarynyń ana tilderin, aqyn-jazýshylardyń kórkem týyndylaryn zerdeleýge, halyq ertegilerin, tarihty, dástúrli sheberlerdi jáne t.b. tanymal etýge júielendirilgen. Joba sheńberinde elimizdiń barlyq óńirlerinde 130-ǵa jýyq is-shara ótkizilip, olarǵa 10 000-nan astam adam qatysty», - dedi vitse-ministr.
Onyń aitýyna qaraǵanda, jyl saiyn Qazaqstan halqy Assambleiasymen birlesip ótkiziletin «Uly dalanyń ultaralyq tili» respýblikalyq forýmy da qazaq tilin etnosaralyq qatynas tili retinde nasihattaýǵa baǵyttalǵan.
«Ortalyq jáne óńirlik deńgeide 2015 jyldan bastap «Myń bala» respýblikalyq mádeni-aǵartýshylyq jobasy júzege asyrylýda. Joba sheńberinde 1,5 mln bala qatysyp, onyń ishinde 280 myńǵa jýyq adam qazaq tilin meńgerýge tartyldy. Qazaq tiliniń qoǵamdaǵy qoldanys aiasyn keńeitý baǵytyndaǵy jumystar atalǵan jobalar jáne basqa da is-sharalar sheńberinde óz jalǵasyn taba beretin bolady», - dedi Serik Egizbaev.
