Pavlodarda Buqar jyraý atyndaǵy ádebiet jáne óner mýzeiinde Ertis óńirinen shyqqan belgili tulǵalardyń dombyralary qoiylǵan zal ashyldy, dep habarlaidy pavlodarnews.kz tilshisi.
Sharaǵa qatysqan ziialy qaýym ókilderi men oblys ákiminiń orynbasary Áliia Arynovaǵa zal boiynsha ekskýrsiia uiymdastyryldy. Jergilikti aitysker Qýanyshbek Sharmanov Ulttyq dombyra kúnine arnalǵan arnaý oryndady. Ádebiet bóliminiń meńgerýshisi Erbol Qaiyrovtyń aitýynsha, kórmege Qazaqstannyń halyq jazýshysy Muzafar Álimbaevtyń dombyrasy alǵashqy ret qoiylyp otyr.
- Bul qos ishekti ulttyq aspapty jazýshynyń jubaiy Shápý apamyzdan arnaiy baryp surap aldyq, - deidi Erbol Qaiyrov. - Muzafar Álimbaevtyń tórinde osy jáne bala, qyrǵyz dombyrasy ilinip turǵan eken. Aqyn shabyty kelip óleń shyǵaratyn kezde únemi qolyna dombyrasyn alyp oinaǵan. Ulttyq dombyra kúni erekshe mereke, sebebi, dombyranyń pernesinde qazaqtyń salt-dástúri men tarihy, muńy men zary jatyr.
Bólim meńgerýshisi aitýly kúnniń kúntizbeden alar orny erekshe ekenin atap ótti.
Týmaidy jurtyn aqyn jylatýǵa, Týady júrekterdi nurlantýǵa. Óleńin oramal ǵyp ótedi olar, Kóz jasyn adamzattyń qurǵatýǵa, - dep aqyn beker jyrlamasa kerek. Bul zalda biylǵy jyly el táýelsizdiginiń qurmetine orai 27 dombyra qoiylǵan.Onyń ishinde kezinde qazaq aspaptarynyń atasy Qamar Qasymov jasap syiǵa tartqan Nuftolla Shákenovtyń, bala kezinde Estaidyń aldynda turyp án shyrqaǵan Qabdykárim Ydyrysovtyń, Dihan Ábilov pen Baiǵabyl Jylqybaevtyń dombyralaryn kórýge bolady.
Sonymen qatar, Potanin atyndaǵy tarihi-ólketaný murajaiynan Qanysh Sátbaevtyń, Estai Berkimbaevtyń dombyralary jáne Qudaibergen Álseiitovtyń búktemeli dombyrasy ákelingen. Qalǵany mýzei qorynan alynǵan.
Aqyn-jazýshylardyń ómir súrgen zamanynan syrt shertetin aspaptardyń ózindik tarihy bar. Máselen, Qaýken Kenjetaevtyń «Aqqýly» dep atalatyn dombyrasynyń ótkennen alar orny zor. Teatr rejisseri «Qyz Jibek pen Tólegen» filminde qos aqqýdy Nurǵissa Tilendievtiń «Aqqý» kúiimen biletken.
Sol filmde Bazarbaidyń rólin oinaǵan ol kino bitkennen keiin osy dombyrany arnaiy tapsyryspen jasatqan. 1990 jyldan bastap dombyra jáne qyl qobyz, prima qobyz, jetigen, úsh ishekti domra (orys halqynyń ulttyq aspaby) syndy aspaptar men qabyn jasaýmen ainalysyp kele jatqan qolónershi Qýandyq Baiazit de dombyra jasaýdyń qyr-syrymen bólisti.
- 30 jylǵa jýyq ýaqyttyń ishinde millionǵa jýyq dombyra jasaǵan shyǵarmyn, - dep kúledi Qýandyq Baiazit. - Zeinetkerlikke shyqqannan beri osy ónerge den qoidym. Syrtyndaǵy qaptamasy men oiýyn ózim oiamyn. Sheberhanam bar. Qasymda balalarym kómektesedi. Sońǵy kezderi dombyra jasaityndar kóbeidi.
2000 jyldary Astanaǵa satýǵa jii alyp baratynmyn. Kóbinese qyzyl aǵash qoldanatynmyn. Biraq qazir qolǵa túse qoimaidy. Sondyqtan qaiyń men terekten jasaimyn. Qolónershi jas býynǵa ulttyq ónerdi úiretýge árdaiym daiyn ekenin aitady.
