Pavlodarlyq qutqarýshylar muz astyna túsip ketken balyqshyny sýdan aman-esen alyp shyqty. Bul týraly Tótenshe jaǵdailar ministrliginiń baspasóz qyzmetinen málim etti, dep habarlaidy "Ult aqparat".
«20 qarasha kúni saǵat 08:10-da 112 pýltine «Akýlenok» shyǵanaǵynyń aýmaǵynda er adamnyń balyq aýlaý kezinde muz astyna túsip ketkeni týraly habarlama kelip tústi. Qutqarýshylar oqiǵa ornyna jedel jetkenimen muzdyń tym juqa bolýyna bailanysty qutqarý jumystary kúrdelene tústi. Qutqarýshylar 1960 jylǵy azamatty muzdan shyǵaryp alyp, jedel járdem qyzmetiniń brigadasyna tapsyrdy. Ol aýrýhanaǵa jatqyzyldy. Jaǵdaiy birqalypty«, - delingen ministrlik taratqan aqparatta.
Sonymen qatar, QR TJM turǵyndarǵa osyndai jaǵdailardyń aldyn alý úshin juqa muzǵa shyqpaýǵa keńes berip otyr.
