Ulttyq ekonomika ministri Rýslan Dálenovtyń aitýynsha myrysh baǵasy 16 paiyzǵa, mys 12, temir keni – paiyzǵa, ferroqorytpalar – 1,2 paiyzǵa túsken.
«Qazirgi kezeńde syrtqy ekonomikalyq jaǵdailar tómendegidei qalyptasyp otyr. Álemdik taýar naryqtarynda munai men metaldardyń baǵasy edáýir tómendegeni baiqalady. 9 naýryzdaǵy jaǵdai boiynsha munai baǵasy bir barreline 34 dollardy qurady. Bul jyl basymen salystyrǵanda eki ese arzan. Kún ishinde munai baǵasy bir barreline 31 dollarǵa deiin tómendegeni baiqaldy», - dedi Rýslan Dálenov Úkimet otyrysynda.
Onyń aitýynsha, metaldardyń baǵasy da tómendegen. Atap aitqanda myrysh baǵasy 16 paiyzǵa, mys 12 paiyzǵa, temir keni 4 paiyzǵa, ferroqorytpalar baǵasy 1,2 paiyzǵa túsken.
«Álemdik kapital naryǵy qubylyp tur. Jyl basynan beri amerikalyq birja indeksteri 14 paiyzǵa, eýropalyq indekster 15 paiyzǵa deiin jáne qytai indeksteri 13 paiyzǵa tómendedi. Bul úrdister syrtqy naryqtardaǵy joǵary belgisizdikti kórsetedi», - dedi ol.
Ministr qazirgi kezeńde Qazaqstannyń kredittik reitingi naqtylanǵanyn atap ótti. Halyqaralyq reitingtik agenttikter Qazaqstannyń derbes kredittik reitingin rastap, boljam «turaqty» deńgeide saqtalǵan. Bul rette reitingti Standard and Poor's osy jylǵy 6 naýryzda, al Fitch Ratings 21 aqpanda aiqyndady.
«Syrtqy halyqaralyq sarapshylardyń pikirinshe, reiting boljamy eldegi makroekonomikalyq turaqtylyq, ishki suranys rezervteri jáne munailyq emes sektordyń ulǵaiýyna bailanysty bolady», - dedi ol.
