Energetika vitse-ministri Áset Maǵaýovtyń aitýynsha, buiryq Energetika, Qarjy, Ishki ister ministrlikteri jáne Ulttyq qaýipsizdik komitetimen birlese bekitilip otyr, dep habarlaidy QazAqparat tilshisi.
«Jalpy munai ónimderi naryǵynda jaǵdai turaqty. Janar-jaǵar mai stantsiialarynda tapshylyq baiqalmaidy. 2019 jyldyń 3 jeltoqsanyndaǵy jaǵdai boiynsha elimizdiń munai bazalaryndaǵy janar-jaǵar mai qaldyqtarynyń sany ishki naryqtyń qajettiligin jabýǵa jetkilikti bolyp otyr. AI-92 benzininiń qory – 182,3 myń tonna (16 kúnge), al dizel otynynyń qory – 210 myń tonna (17 kúnge). Qazirgi óndiris ishki tutyný suranysyn tolyǵymen jabady», - dedi Áset Maǵaýov Úkimettiń baspasóz ortalyǵynda ótken brifing barysynda.
Vitse-ministrdiń aitýynsha, qazaqstandyq óndiristiń joǵary oktandy benzinin eksporttaý úshin zańnamalyq baza tolyǵymen daiyndalǵan. Biyl maýsym aiynan qarashaǵa deiin 106,1 myń tonna eksporttalǵan. Bolashaqta eldiń eldiń ishki naryqtaǵy suranysyn qamtamasyz etkennen keiin bos kólem bolǵan jaǵdaida eksport kólemin ulǵaitý josparlanyp otyr.
«Bul rette shekaralas oblystarda munai ónimderiniń ruqsat etilmegen tasymalyn boldyrmaý úshin Energetika, Qarjy, Ishki ister ministrlikteri Ulttyq qaýipsizdik komitetimen birlesip, munai ónimderin avtokólikpen shyǵarýǵa tyiym salý týraly buiryqty bekitti. 2019 jyldyń 3 jeltoqsanyndaǵy jaǵdai boiynsha respýblikada AI-92 benzininiń ortasha bólshek saýda baǵasy – 148,1 teńge, dizel otynyna – 193,3 teńgeni quraidy», - dedi ol.
