QR Premer-Ministri A. Maminniń tóraǵalyǵymen 2019 jylǵy qańtar-mamyr ailaryndaǵy munai-gaz salasynyń damýy týraly ótken Úkimet otyrysynda energetika ministri Q. Bozymbaev baiandama jasady, dep habarlaidy "Ult aqparat".
Energetika ministrliginiń málimetterinshe, munai jáne kondensat óndirý kólemi 36,5 mln tonnany qurady. Bul biylǵy 5 aidyń josparyna 101%-ǵa sáikes, al 2018 jyldyń sáikes kezeńimen salystyrǵanda 96,8% kórsetip otyr. Úsh iri joba boiynsha munai óndirý kólemi 21,7 mln tonnany qurady. Sonyń ishinde Qashaǵanda 4 mln-nan astam tonna, Teńizde 12,48 mln tonna, Qarashyǵanaqta 5 mln tonna shamasynda munai óndirildi.
«Qashaǵanda birinshi josparly kúrdeli jóndeý jumystary sátti aiaqtaldy. Qazirgi tańda Qashaǵanda munai óndirýdiń kólemi rekordtyq deńgeiin kórsetýde –táýligine 400 myń barrelge jýyq. Jalpy alǵanda, biylǵy munai óndirý jospary oryndalatyn bolady», — dedi Q. Bozymbaev.
Biylǵy 5 aida munai óńdeý kólemi shamamen 6,7 mln tonnany qurady, bul 2018 jyldyń sáikes kezeńimen salystyrǵanda 5%-ǵa joǵary.
Munai ónimderiniń negizgi túrlerin óndirý kólemi 5 mln tonnadan asty, bul ótken jyldyń sáikes kezeńimen salystyrǵanda 14%-ǵa joǵary. Jalpy, munai ónimderi naryǵyndaǵy jaǵdai turaqty. Janar-jaǵarmai tapshylyǵy joq.
Energetika ministrliginiń málimetterinshe, biylǵy 7 maýsymyndaǵy jaǵdai boiynsha Qazaqstanda Ai-92 markaly benzinniń ortasha baǵasy litrine 148,7 teńgeni, al jazǵy dizel otynynyń baǵasy 192 teńgeni quraidy. Sonymen qatar, Ai-92 markaly benzin baǵasynyń tómendeýi baiqalady. Máselen, Ai-92 markaly benzinge eń tómengi baǵa – Batys Qazaqstan oblysynda 139 teńge bolsa, dizeldik otynǵa eń tómengi baǵa Túrkistan oblysynda – 175 teńge.
«Qazaqstandyq joǵary oktandy benzindi eksporttaýǵa keletin bolsaq, búgingi tańda zańnamalyq baza tolyǵymen daiyn. Jaqyn arada Ulttyq ekonomika ministrliginiń ashyq tústi munai ónimderine Eksporttyq keden bajdarynyń mólsherlemesin tómendetýge sáikes buiryǵynyń qabyldanýy kútilýde. Osy jyldyń maýsym aiynyń ekinshi jartysynda benzindi eksporttaý bastalady», — dedi Q. Bozymbaev.
Biylǵy 7 maýsymdaǵy jaǵdai boiynsha elimizdiń munai bazalaryndaǵy JJM qaldyqtarynyń sany ishki naryq qajettilikterin qamtýǵa jetkilikti: Ai-92 benzininiń qory 192,4 myń tonna, dizeldik otyn — 196,4 myń tonna.
Bekitilgen kestege sáikes, aýyl sharýashylyǵy taýaryn óndirýshilerge 380 myń tonna dizeldik otyn jetkizilýi tiis. QR Aýyl sharýashylyǵy ministrliginiń ótinimine sáikes, dizel otynyna suranys tolyqtai qanaǵattandyryldy.
Energetika ministriniń aitýynsha, jyl basynna beri 23 mlrd tekshe metr gaz óndirildi. Josparmen salystyrǵanda asyra oryndaý 1,3% quraidy. Gaz eksporty 7,7 mlrd m3 nemese 2018 jyldyń sáikes kezeńiniń 89,5% qurady. Eksport kólemderin tómendetý gazdy ishki tutynýdyń ulǵaiýymen bailanysty.
Suiytylǵan munai gazynyń óndirisi 5 aida 1,28 mln tonnany qurady.
Q. Bozymbaevtyń habarlaýynsha, elektr qýatyn óndirý kólemi 44,1 mlrd kVt/saǵ qurady. Ýran óndirý kólemi 9 myń tonnadan asty, bul 2018 jyldyń sáikes kezeńine 100,4% qurady.
