Qyzylorda oblysynyń ákimi Qyrymbek Kósherbaev munai baǵasynyń ósýi jáne kómirsýtegi eksporty úlesiniń artýy munai óndirýshi kompaniialarǵa belgili bir mindetterdi júkteitinin atap ótti.
Qyzylordada jer qoinaýyn paidalanýshylarymen kezekti kezdesý ótip, munai-gaz salasyn damytý máseleleri talqylandy, atap aitqanda, munai óndirýdi, eksportty jáne kompaniialardyń áleýmettik mindettemelerin arttyrý máselesi sóz boldy.
Kezdesýdi ashqan oblys ákimi Qyrymbek Kósherbaev Syr óńiri ózge aimaqtarǵa qaraǵanda álemdik munai baǵasynyń tómendeýinen eń úlken zardap shekkenin tilge tiek etti. Óitkeni, elimizdegi munai kólemi azaiýynyń 70 paiyzy Qyzylorda oblysynda oryn aldy. Jyl saiyn munai óndirý ortasha eseppen 12 paiyzǵa tómendeidi. Tek sońǵy 5 jyldyń ishinde óndirilgen munai kólemi 3,7 mln.tonnaǵa qysqardy, sáikesinshe, salyq túsimi de 5 jyl ishinde 3 esege azaidy. Óndiris kóleminiń tómendeýine qaramastan, munai-gaz jáne taý-ken ónerkásibi óńir ekonomikasynyń negizi bolyp qala bermek.
Esterińizge sala keteiik, óńirdiń ónerkásiptik óndirisiniń 80% -dan astamyn munai men ýran quraidy.
«Búgingi tańda oblystyń munai kompaniialary óndirgen munaidyń ortasha eseppen 80%-y ishki naryqta qalsa, al eksportqa 20%-yn satady. Alaida, búgingi kúni munai satý kólemin 50%-50% -ǵa deiin satý týraly másele qarastyrylýda. Óndiriletin ónimderdi satýdyń mundai araqatynasy munai kompaniialaryna kiristerin arttyrýǵa múmkindik beredi. Osylaisha, biz kompaniialarǵa alynǵan qarjyny birinshi kezekte jańa ken oryndaryn barlaýǵa jáne burǵylaýǵa baǵyttaýǵa shaqyramyz», - dedi oblys basshysy.
Sonymen qatar, oblys ákimi munai óndirýde jańa tehnologiialardy engizýdiń, munai óndirý kólemin arttyrý jáne óndiriletin ónimniń sýlanýyn tómendetýdiń mańyzdylyǵyn atap ótti.
«Tabystaryńyz eń aldymen aktsionerlerdiń dividendine emes, munai-gaz salasyn ári qarai turaqtandyrý jáne damytýǵa baǵyttalýy tiis. Kompaniialarǵa áleýmettik saiasatty qaita qarap, burynǵy áleýmettik mindetterin qaita alý kerek», - dep qorytyndylady oblys ákimi.
Óz kezeginde, munai óndiretin kásiporyndardyń basshylary júrgizgen jumystary týraly baiandap, kókeidegi suraqtaryn qoidy.
Atap ótsek, Úkimetpen birlesip atqarǵan jumystar nátijesinde «PetroQazaqstan Qumkól Resorsiz» AQ, Maibulaq jáne Arysqum ken oryndarynda kómirsýtegi shikizatynyń 3 ken ornyn paidalaný úshin kelisimshart merzimin uzartty. Sondai-aq Qarabulaq ken ornynda kómirsýtegin óndirý jónindegi jańa kelisimshartqa qol qoidy. Budan basqa, «Kristall Menedjment» AQ kómirsýtegi shikizatynyń perspektivalyq blogy boiynsha izdestirý jumystaryn Ońtústik Torǵai alqabynda júrgizedi.
