Taiaýda oblys ákimdigi apparatynda oblys ákiminiń orynbasary Erbol Sadyrdyń tóraǵalyǵymen múgedekter isi boiynsha keńestiń otyrysy ótti. Bul týraly OQO ákiminiń baspasóz qyzmeti habarlady.
Kún tártibinde oblystaǵy múmkindigi shekteýli azamattardy áleýmettik qorǵaý sharalary men olardyń sanynyń ósý sebepteri jáne múgedektiktiń aldyn alý jumystaryn kúsheitý boiynsha atqarylǵan jumystar jaiy qaraldy. Sondai-aq, otyrysta inkliýzivti bilim berýdi damytý týraly uiymdastyrylyp jatqan is-sharalar men kólik infraqurylymy obektilerinde qoljetimdi orta qurý týraly máseleler de talqylandy.
Máselen, inkliýzivti bilimmen qamtamasyz etilgen balalardyń úlesin biyl 16,5 paiyzǵa jetkizý boljansa, búginge deiin bul jumystar 16,7 paiyzǵa, iaǵni 129 balaǵa artyq oryndalyp otyr. Múgedekterge qoljetimdi orta qurý aiasynda 352 nysandy beiimdeý josparlanyp, qazirgi tańǵa olardyń 50-i beiimdeldi. Sonymen qatar, múgedekterge qoljetimdi orta qurýǵa kásipkerlerdi jumyldyrý maqsatynda 2016 jyly «Biz birgemiz!» aktsiiasy ótkizildi. Osy jumystardy júrgizý úshin 165 mobildik top qurylyp, 2938 nysan zerdeleýden ótkizildi. Nátijesinde 790 jeke nysan men trotýar retke keltirildi. Atalǵan baǵyttaǵy jumystardy odan ári jandandyrý, qoǵamnyń nazaryn múmkindigi shekteýli azamattardyń problemasyna aýdarý úshin 2017 jyldyń 20 mamyr-20 tamyz aralyǵynda «Biz birgemiz!» atty aktsiiasy jalǵasýda.
Munan bólek, 2014-2016 jyldary 7537 múgedek azamat jumyspen qamtyldy. Sonymen qatar, 2016 jyly 76 adam qaita daiarlaý kýrstaryna joldanyp, turaqty jumysqa ornalasýǵa múmkindik aldy. 101 adam mal jáne egin sharýashylyǵymen ainalysý maqsatynda shaǵyn nesie alyp, eńbek qatynastaryn zańdastyryp, 200-ge jýyq adamdy jumyspen qamtyp, jańa jumys oryndaryn ashyp otyrǵan. 2017 jyldyń 1 maýsymyna 783 azamat jumysqa ornalasty.
Aita ketý kerek, oblystaǵy múgedekter sany búgingi tańǵa 117 myńnan asyq. Olardyń óńir halqyna shaqqandaǵy úlesi 4,1%-dy quraidy.
