Múmkindigi shekteýli jandar qoǵamdaǵy aitarlyqtai aýqymdy resýrs bolyp otyr. Bul týraly elordadaǵy EQYU baǵdarlamalary keńsesiniń basshysy Derd Sabo aitty, dep habarlaidy QazAqparat.
«Múgedektigi bar adamdardyń sailaýǵa belsendi qatysýy óte mańyzdy dep bilemin. Osy baǵytta Qazaqstan qoǵamynda atqarylyp jatqan sharalar qýantyp otyr. Bul óz kezeginde jalpy qoǵamdaǵy aitarlyqtai aýqymdy resýrs ekenin umytpaǵan jón. Osy oraida bilikti maman barshylyq jáne olar bizge kómektesip keledi», - dedi Derd Sabo «Múgedektigi bar adamdardyń saiasi jáne qoǵamdyq ómirge qatysýlary» atty dóńgelek ústel otyrysynda.
Sonymen qatar ol bul máselede memlekettik organdardyń belsendi qatysýyna oń baǵa berdi.
«Memlekettik organdar bul adamdardy azamattyq qoǵamǵa tartýǵa talpynýda. Biz azamattyq qoǵammen birlese jumys isteýdemiz. Sáikesinshe, osy protseske qoldaý jasaýǵa tyrysyp kelemiz», - dedi Derd Sabo.
Budan buryn habarlanǵandai, QR Eńbek jáne halyqty áleýmettik qorǵaý ministrligi 2021 jylǵy 10 qańtarda ótetin Parlament Májilisi men máslihat depýtattarynyń sailaýynda múgedektigi bar adamdar úshin qoljetimdi ortany qamtamasyz etý maqsatynda aýmaqtyq sailaý komissiialary úshin birqatar usynym ázirledi.
QR Eńbekmini Ortalyq sailaý komissiiasynyń nusqaýlyǵyna sáikes múgedektigi bar adamdar úshin sailaý ýchaskeleriniń qoljetimdiligin qamtamasyz etýdi usynady. Atap aitqanda, pandýstar, shaqyrý knopkalaryn, taktildi plitkalar, monitory bar kompiýterler, qosymsha jaryqtandyrý, trafaretter jáne t. b. ornatýdy qamtamasyz etý qajet. Budan basqa, onlain-sýrdoaýdarma nemese ymdaý tili mamandarynyń kezekshiligi usynylady. Sonymen qatar, sailaý ýchaskeleri ǵimarattyń birinshi qabatynan joǵary ornalasqan jaǵdaida múgedektigi bar adamnyń arbasyna arnalǵan arnaiy lift bolýy kerek.
