Áleýmettik qorǵaý týraly zań jobasynyń normalary memleket tarapynan bazalyq áleýmettik kepildikterdi qamtamasyz etýdiń ózekti máselelerin kórsetedi. Bul týraly búgin Májiliste zań jobasyn tanystyrý barysynda QR Eńbek jáne halyqty áleýmettik qorǵaý ministri Serik Shapkenov málim etti, dep habarlaidy QazAqparat.
«Zań jobasynyń taǵy bir negizgi jańalyqtarynyń biri - eńbek qyzmetin qaita bastaǵan jaǵdaida, bala bir jasqa tolǵanǵa deiin onyń kútimine bailanysty tabysynan aiyrylǵan jaǵdaida tólenetin áleýmettik tólem somasynyń kepildik berilgen deńgeiin (respýblikalyq biýdjetten bir jasqa deiingi bala kútimi boiynsha osyǵan uqsas ai saiynǵy memlekettik járdemaqy deńgeiinde) belgileý bolyp otyr», - dedi ministr.
Serik Shapkenov múgedek balany kútim jasaý kezeńin 18 jasqa deiin uzartýǵa toqtala kele, buryn múgedek balany kútim jasaý kezeńi 16 jasqa deiin eskerilgenin jetkizdi.
«Bul norma múgedek balalardyń jas toptarynyń ózgerýine bailanysty engiziledi. Budan basqa, ol jasyna bailanysty zeinetaqy tólemderi men bazalyq zeinetaqy taǵaiyndaý kezinde oń áserin tigizedi. Jalpy, Zań jobasynda baiandalǵan normalar múgedekterdi áleýmettik qoldaý, ataýly áleýmettik kómek jáne zeinetaqymen qamsyzdandyrý máselelerin qosa alǵanda, memleket tarapynan bazalyq áleýmettik kepildikterdi qamtamasyz etýdiń ózekti máselelerin kórsetedi», - dedi vedomstvo basshysy.
Ministrdiń aitýynsha, zań jobasyn qabyldaý biýdjet qarajatyn qosymsha bólýdi talap etpeidi, shyǵyn normalary 2021 – 2023 jyldarǵa bólingen qarajat – 55,4 mlrd teńge aiasynda iske asyrylatyn bolady.
