Búgin Májilistiń jalpy otyrysynda «Qazaqstan Respýblikasynyń keibir zańnamalyq aktilerine inkliýzivti bilim berý máseleleri boiynsha ózgerister men tolyqtyrýlar engizý týraly» zań jobasy maquldandy. Májilis tóraǵasy Nurlan Nyǵmatýllin erekshe bilim berýdi qajet etetin balalarǵa tiisti jaǵdailar jasalatynyn aitty. Onyń aitýynsha, maquldanǵan zań jobasy múmkindigi shekteýli balalarǵa basqalarmen birdei sapaly bilim alýǵa jol ashady, - dep habarlaidy «Ult aqparat».
Iaǵni Májilis tóraǵasy bilimdi damytý, adam qandai da bir ereksheligine qaramastan bilim alýǵa quqyly ekenin eskertti.
«Bilimdi damytý, bilimdi urpaqty tárbieleý jolynda eshqandai kedergi bolmaýy kerek. Sebebi, ol bizdiń ultymyzdyń, elimizdiń bolashaǵy. Sondyqtan Memleket basshysy Qasym-Jomart Toqaev jalpy bilim, sonyń ishinde erekshe bilim berý talaptaryn jetildirý máselelerine qatysty arnaiy tasyrma bergen bolatyn», - dep atap ótti Nurlan Nyǵmatýllin.
Inkliýzivti bilim berý mekemesiniń ustazy Dinara Jarqymbek erekshe balalarǵa bilim berý týraly oiymen bólise otyryp, máselelerdiń de joq emes ekenin atap ótti. Onyń aitýynsha, erekshe balalarǵa eń aldymen tolyqqandy bilim berý máselesi ózekti.
«Men sóileý jáne estý qabiletteri tómen nemese múlde joq balalarǵa bilim berip júrgenime jiyrma jyldan asty. Osy jyldar aralyǵyndaǵy tájiribeme súiene otyryp aitsam, mundai balalarǵa bilim berý ońai emes. Ásirese bala sanyn azaita otyryp bilim berý kerek. Óitkeni balalardyń qabyldaýy ártúrli. Sonymen qatar, mundai balalarǵa arnalǵan mektep olqýlyqtary da joqtyń qasy. Biz ózimiz oqý josparyn jasai otyryp, ádistemelik jumystar arqyly oqýlyqtar ázirleýge májbúrmiz. Degenmen, qazirgi tańda bári de ońalyp kele jatyr. Kóńil soǵan qýanady, eń bastysy», - dedi ustaz Dinara Jarqymbek.
Osy oraida ol ázirlenip, búgin maquldanǵan zań jobasynda birqatar mańyzdy suraqtar qamtylyp otyrǵanyn aitty.
«Endi inkliýzivti bilim berýge zamanǵa sai standarttar engiziledi. Bul jolda erekshe bilim berýdi qajet etetin balalardyń turǵylyqty jeri eskerilgen. Sonymen birge, atalǵan balalardyń mártebesi zań deńgeiinde tolyqtai jáne naqty rettelip otyr. Sondyqtan bul zań jobasy múmkindigi shekteýli balalarǵa basqalarmen birdei sapaly bilim alýǵa, osy salany bilikti mamandarmen qamtamasyz etýge, inkliýzivti bilimdi joǵary deńgeide uiymdastyrýǵa jol ashatyn bolady», - dedi Májilis tóraǵasy.
Al tórt balasynyń ekeýi múmkindigi shekteýli ana Qymbat Altaeva erekshe balalarǵa bilim berýmen qatar, tárbieleý, kóńilderin tabý, qoǵamǵa beiimdeý de ońai emes ekenin aitady. Óitkeni mundai balalar árdaiym erekshe kóńil bólgendi talap etetin kórinedi.
«Allanyń qalaýymen úsh qyz, bir uldy ómirge ákeldim. Sonyń ishinde ulym men bir qyzymnyń tili shyqpady. Alǵashqyda erkelik shyǵar dep mán bermegenbiz. Keiinnen solai erekshe týǵan balalar ekenin bildik. Almatyda bilim alsyn dep, arnaiy kóship kelip, páter jaǵalap júrmiz. Óitkeni balalarym sóilei almaidy eken dep, qoǵamnan shettep qalǵanyn qalamaimyn. Olarǵa árdaiym erekshe kóńil bólý kerek. Bir sát burynǵydai bolmai qalsań, kóńilderine alyp qalady. Meni jaqsy kórmei qaldy dep oilap qalady. Sondyqtan únemi nazardan tys qaldyrmaimyn. Al bilim beretin ustazdaryna tipti ońai emes ekenin túsinemin», - deidi Qymbat apai.
Esterińizge sala keteiik, búgin Májilistiń jalpy otyrysynda «Qazaqstan Respýblikasynyń keibir zańnamalyq aktilerine inkliýzivti bilim berý máseleleri boiynsha ózgerister men tolyqtyrýlar engizý týraly» zań jobasy maquldandy. Májilis tóraǵasy Nurlan Nyǵmatýllin erekshe bilim berýdi qajet etetin balalarǵa tiisti jaǵdailar jasalatynyn aitty. Onyń aitýynsha, maquldanǵan zań jobasy múmkindigi shekteýli balalarǵa basqalarmen birdei sapaly bilim alýǵa jol ashady.
