Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine azamattardyń jekelegen sanattaryn áleýmettik qorǵaý máseleleri boiynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaidy "Ult aqparat".
Atalǵan zań jobasy Májiliste biyl 26 mamyrda birinshi oqylymda maquldanǵan bolatyn.
Zań jobasy Múgedekterdiń quqyqtary týraly konventsiianyń normalaryn qoldanystaǵy zańnamaǵa implementatsiialaý, sondai-aq Qazaqstan Respýblikasynda múgedek adamdardyń quqyqtaryn qamtamasyz etý jáne turmys sapasyn jaqsartý jónindegi 2025 jylǵa deiingi ulttyq jospardy iske asyrý maqsatynda ázirlendi.
Májilistiń Áleýmettik-mádeni damý komitetiniń málimetinshe, Zań jobasymen jumys isteý barysynda depýtattar birqatar túzetýler engizdi, olar:
- múgedektik toby belgilengen múgedek balalarǵa joǵarylatylǵan járdemaqylar taǵaiyndaý merzimderin aiqyndaýǵa;
- bala kezinen birinshi toptaǵy múgedektiń kútimine bailanysty uqsas járdemaqy alatyn adamdarǵa múgedektiń kútimine bailanysty járdemaqyny taǵaiyndaý tártibin ońailatýǵa baǵyttalǵan. Osy maqsatta depýtattar normalar qabyldady, bul normalarǵa sáikes mundai adamdarǵa birinshi toptaǵy múgedektiń kútimine bailanysty járdemaqy memlekettik organdardyń nemese uiymdardyń tiisti aqparattyq júielerindegi málimetter negizinde qaita taǵaiyndalatyn bolady;
- múgedekterdi Áleýmettik kórsetiletin qyzmetter portaly arqyly kómekshi quraldarmen, arnaýly júrip-turý quraldarymen, kórsetiletin qyzmettermen qamtamasyz etý, sondai-aq tabysy az otbasylarǵa kepildik berilgen áleýmettik toptama usyný protsesterin jetildirýge baǵyttalǵan.
Sonymen qatar, múgedektiń muqtajdaryn aiqyndaýdyń jeke-dara tásilin qamtamasyz etý úshin zańnamalyq negiz qalyptastyrý maqsatynda depýtattar tolyqtyrýlar engizedi, onda:
múgedektiń tehnikalyq kómekshi quraldarǵa, arnaýly júrip-turý quraldaryna (tehnikalyq ońaltý quraldary), kórsetiletin qyzmetterge qajettilikterin baǵalaýǵa sáikes múgedekti ońaltýdyń jeke baǵdarlamasyn jasaý;
QR Úkimetine múgedektiń qajettilikterin baǵalaý tártibin bekitý boiynsha qosymsha quzyretin berý kózdeledi.
Zań jobasyn ekiudai túsinýdi bolǵyzbaityn jáne ony Qazaqstan Respýblikasynyń qoldanystaǵy zańnamasyna, zań tehnikasy qaǵidalaryna sáikes keltirýge baǵyttalǵan redaktsiialyq jáne naqtylaýshy sipattaǵy birqatar túzetýler engizildi.
Zań jobasynda 16 zańnamalyq aktige, onyń ishinde 2 kodekske (Qazaqstan Respýblikasynyń Eńbek, Biýdjet kodeksterine) jáne 14 zańǵa ózgerister men tolyqtyrýlar engizý kózdelgen.
