Eriktiler Elbasynyń bastamasymen «Biz birgemi» respýblikalyq aktsiiasy aiasynda birneshe apta boiy igi ister atqarýda, dep habarlaidy elorda ákimdiginiń resmi saity. Elordada 4 kún ishinde 600 myńnan astam maska taratyldy.
Sonymen qatar búginde 9 myńnan astam otbasy azyq-túlik sebetimen qamtylǵan. «Nur-Sultan qalasynda «Biz birgemiz» aktsiiasyna 500-ge jýyq volonter tartyldy. Búgin 300 otbasyna arnalǵan 300 azyq-túlik sebeti taratyldy jáne aktsiia endi ǵana qarqyn alýda», – deidi JAS OTAN jastar qanatynyń jetekshisi Elnur Beisenbaev.
«Bir aidan beri eriktilermen jumys isteýdemiz. Bul igi is. Sebebi biz kóptegen adamdarǵa kómektese alamyz. Adamdar qatty qýanady, habarlasady, alǵys aitady», – deidi erikti Aiaýlym Álseitova.
Azyq-túlik paketterin suryptaýǵa jáne oraýǵa kún saiyn 10 saǵatqa deiin ýaqyt ketedi, dep túsindirdi jasotandyqtar. Muqtajdar tizimin aýdandyq ákimdikter jasaidy. Biraq olardyń barlyǵy áleýmettik jaǵynan osal toptar emes. Ýaqytsha jumysynan airylǵandarǵa da kómek kórsetiledi.
«Sondai-aq búgingi kúni qiyn jaǵdaiǵa tap bolǵan adamdar bar. Olardyń kúndelikti tabysy bolǵan. Biri kólik jóndeýde jumys istegen, bireýleri kafede, meiramhanalarda daiashy bolǵan.Osyndai da otbasylar bar. Biz barlyǵyna kómektesýge tyrysamyz», – deidi A.Beisenbaev.
Elbasynyń tapsyrmasymen «Birgemiz!» aktsiiasy aiasynda 2 mln maska bólinip, ol 40 myń az qamtylǵan otbasylaryna taratylady. Sondai-aq, «Birgemiz!» respýblikalyq eriktiler front-ofisi uiymdastyrǵan aktsiia aiasynda elordalyq jastar saiasaty basqarmasymen birge múmkindigi shekteýli balalarǵa 100 myń maska taratyldy. Al 40 myń az qamtylǵan otbasy meditsinalyq maskalar jiyntyǵyn alady. Taǵy 30 myń maska elorda turǵyndaryna tegin taratyldy. Qala ákimdigi «SK Farmatsiia» kompaniiasymen birlesip, júieli túrde betperde jáne basqa da qorǵanys quraldaryn jetkizýde.
