"Qazatomónerkásip" ulttyq kompaniiasynyń eks-basshysy Muhtar Jákishevti shartty túrde merziminen buryn bosatý týraly sot úkimi kúshine endi, dep habarlaidy Sputnik Qazaqstan.
Jákishev merziminen buryn úsh jyl, eki ai jáne 17 kúnge erte bosatylyp otyr. Jazasynyń ótelmegen merzimi aiaqtalǵanǵa deiin ol turǵylyqty jeri boiynsha probatsiialyq baqylaýda bolady. Osy ýaqyttyń ishinde Qazaqstan aýmaǵynan shyǵýǵa tyiym salynady.
Sońǵy otyrysta Jákishevtiń ózi sot zalyna kelgen joq, kezekti protseske beinebailanys arqyly qatysty. Al prokýror sýdiadan advokat Nurlan Beisekeevtiń Jákishevti shartty túrde merziminen buryn bosatý týraly ótinishin qanaǵattandyrmaýdy suraǵan. Memlekettik aiyptaýshynyń sózine qaraǵanda, sottalýshy 99 milliard teńge shyǵynnyń tek 200 myń teńgesin ǵana ótedi.
3 naýryzda ótken sot otyrysyna Eýropa men Nur-Sultandaǵy elshilikterden kelgen baqylaýshylar da qatysty. Qazaqstannyń basqa da óńirlerinen kelgen janashyrlar kóp boldy.
Muhtar Jákishevtiń isi
"Qazatomónerkásip" ulttyq kompaniiasynyń burynǵy basshysy Muhtar Jákishev elordada 2009 jyldyń mamyrynda ustaldy. Oǵan iri ýran ken oryndarynda memlekettik úlesti satty degen aiyp taǵyldy.
Sot protsesi jabyq ótti. Jákishev sot úkimimen kináli dep tanylyp, 14 jylǵa bas bostandyǵynan aiyryldy.
2018 jyldyń qyrkúieginde jaza merziminiń jartysynan kóbin ótegennen keiin, Semeidiń №2 sotyna shartty túrde merziminen buryn bosatý týraly ótinish bildirdi. Alaida, sot 99,6 milliard teńge mólsherindegi shyǵyndy ótemegeni úshin ótinishin qanaǵattandyrmady.
2018 jyly shildede Jákishev Semeidegi OV-156/14 koloniiasyna aýystyryldy. Buǵan deiin ol Almaty oblysyndaǵy Zarechnyi aýylynda, sodan keiin Qaraǵandy oblysyndaǵy Dolinka eldi mekeninde jazasyn ótedi.
2019 jyldyń 24 shildesinde sot taǵy da Jákishevtiń ótinishin qoldaǵan joq.
Osy jyldyń aqpan aiynda Jákishev Semei sotyna úshinshi ret shartty túrde merziminen bosatý týraly ótinish bildirgen.
Muhtar Jákishev "Qazatomónerkásip" kompaniiasyna 1998 jyly keldi. Ol kezde ulttyq kompaniianyń 85 million dollar bereshegi bolǵan. Bir jyl ótkennen keiin "Qazatomónerkásip" shyǵynsyz jumys isteitin deńgeige shyqty, Qazaqstan ýranynyń eksportyna qoiylǵan shekteý alynyp tastaldy. Al 2009 jyly "Qazatomónerkásip" ýran óndirý kólemi boiynsha álemde birinshi orynǵa ielik etti.
