Qazaqstan Premer-Ministriniń orynbasary – Syrtqy ister ministri Muhtar Tileýberdi Qazaqstanǵa resmi saparmen kelgen Iadrolyq synaqtarǵa jappai tyiym salý týraly shart uiymynyń (IaSJTShU) Atqarýshy hatshysy Robert Floidpen kezdesti. Qyzmetke kiriskennen keiin bul R.Floidtyń alǵashqy sheteldik sapary, dep habarlaidy "Ult aqparat" SIM baspasóz qyzmetine silteme jasap.
M.Tileýberdi Qazaqstannyń iadrolyq synaqtarǵa tyiym salý rejimin nyǵaitý saiasatyna, iadrolyq qarýdan azat álem qurýǵa jáne Iadrolyq synaqtarǵa jan-jaqty tyiym salý týraly sharttyń (IaSJTSh) tez arada kúshine enýine berik ustanymyn rastady. Atqarýshy hatshynyń óziniń alǵashqy resmi saparyn Qazaqstannan bastaýynyń jáne jabylýynyń 30 jyldyǵy qarsańynda burynǵy Semei iadrolyq poligonyna barýynyń simvoldyq máni bar. Bul sondai-aq aldaǵy 29 tamyzda Iadrolyq synaqtarǵa qarsy halyqaralyq kúnimen jáne Ortalyq Aziiada iadrolyq qarýdan azat aimaq qurylýynyń 15 jyldyǵymen tuspa-tus keledi.
Óz kezeginde R.Floid IaSJTShU qyzmetine qoldaý kórsetkeni úshin qazaqstandyq tarapqa alǵysyn bildire otyryp, Qazaqstannyń iadrolyq qarýsyzdaný salasyndaǵy erekshe rólin atap ótti jáne Shartqa qatysýshy elderdiń birlesken kúsh-jigerimen iadrolyq qarýsyz beibitshilik ornatý jónindegi maqsatqa qol jetkize alady degen úmitin bildirdi.
Taraptar sondai-aq yntymaqtastyqtyń ózekti máselelerin, atap aitqanda, iadrolyq synaqtar men jergilikti jerlerdegi inspektsiialarǵa monitoring júrgizýdiń halyqaralyq júiesi stantsiialary jelisiniń jumys isteýin kózdeitin verifikatsiialyq rejimdi nyǵaitýdy talqylady.
Kezdesý qorytyndysy boiynsha Birlesken málimdeme qabyldanyp, onda taraptar iadrolyq qarýsyzdaný men taratpaýǵa ózderiniń beiildiligin rastady. Onda sondai-aq barlyq memleketterge iadrolyq synaqtar júrgizýge moratoriidi saqtaýdy jalǵastyrýǵa, halyqaralyq beibitshilik pen qaýipsizdikti qoldaýǵa baǵyttalǵan Iadrolyq synaqtarǵa jan-jaqty tyiym salý týraly shartqa qol qoiýǵa jáne/nemese ratifikatsiialaýǵa shaqyrý qamtylǵan.
