Aýǵanstannyń ekonomikasyn kórshi eldermen, sonymen birge Ortalyq Aziia memleketterimen integratsiialaýdyń mańyzy zor. QR Syrtqy ister ministri Muhtar Tileýberdi Nur-Sultanda ótip jatqan Eýropadaǵy qaýipsizdik jáne yntymaqtastyq uiymynyń (EQYU) Aýǵanstan boiynsha dóńgelek ústel otyrysynda osylai dedi, dep habarlaidy QazAqparat.
«Sońǵy 28 jylda Qazaqstan aimaqtaǵy tarihy men mádenieti ortaq seriktesterimen tyǵyz bailanys ornatýda tyń bastamalardy kóterip keledi. Kezinde tarihi turǵyda zor mańyzǵa ie bolǵan, Jibek joly boiyndaǵy Ortalyq Aziia elderiniń geografiialyq ornalasýy – ózara qarym-qatynasty kúsheitýge múmkindik beredi. Sondai-aq, Ortalyq Aziia memleketteri basshylarynyń beiresmi otyrysynyń arqasynda yntymaqtastyqqa jańa jol ashyldy. Qazirgi tańda bizdiń kóshbasshylar ortaq mindetterdi oryndaýda ortaq amal-ádisterdi oilap tabýǵa nyq senimmen kele jatyr. Máselen, 2018 jyldyń tamyzynda Ortalyq Aziia elderiniń basshylary Túrikmenstanda kezdesip, Aral teńizin qutqarý sharalaryn talqylady. Alaida, búgingi jáne erteńgi kún úshin de kúrdeli máselelelerdiń biri – Aýǵanstandaǵy turaqtylyqqa bailanysty ekenin bárimiz bilemiz», - dedi QR Syrtqy ister ministri Muhtar Tileýberdi otyrys barysynda.
Ministrdiń aitýynsha, Aýǵanstannyń turaqty túrde damýy, ondaǵy beibitshilik pen turaqtylyq – aimaqtaǵy yntymaqtastyqtyń damýyna nyq úles qosady.
«Qazaqstan – aimaqtyq yntymaqtastyqtyń belsendi advokaty retinde aimaqtaǵy «oiynshylar» arasyndaǵy ózara túsinistikke jetý úshin kúsh biriktirýdi kózdeidi. Aýǵanstan tolyǵymen beibit protseske, ómirge oralyp, halyqaralyq alańda Qazaqstan saiasaty úshin basymdyqqa ie elderdiń biri bolyp qala beredi», - dedi ol.
Muhtar Tileýberdi óz sózinde ózara yntymaqtastyqtyń aiasyn keńeite otyryp, Aýǵanstannyń ekonomikasyn kórshi eldermen, sonymen birge Ortalyq Aziia memleketterimen integratsiialaýdyń mańyzy zor ekenin atap ótti.
«Eki apta buryn Qasym-Jomart Toqaev Niý-Iorktegi BUU Bas Assambleiasynyń 74-shi sessiiasynda bizdiń elimizdiń Aýǵanstanǵa kómek kórsetýdi jalǵastyrýǵa daiyn ekenin bildirgen bolatyn. Memleket basshysy myqty yntymaqtastyq, uzaq merzimdi investitsiia, aimaqtyq kelisim – tabys pen eldegi beibit protsesterge qol jetkizýdi sheshýshi faktor ekenin atap ótti», - dedi ol.
Eske sala ketsek, Nur-Sultanda ótip jatqan Eýropadaǵy qaýipsizdik jáne yntymaqtastyq uiymynyń (EQYU) Aýǵanstan boiynsha dóńgelek ústelinde Muhtar Tileýberdi «Jýsan» operatsiiasynyń izimen Qazaqstan Iraktan 14 balany qaitaryp alýdy josparlap otyrǵanyn málim etken bolatyn.
