QR Parlamenti Májilisinde palata spikeri Nurlan Nyǵmatýlinniń tóraǵalyǵymen jáne óńir ókilderiniń qatysýymen «Qazaqstan Respýblikasynda beibit jinalystardy uiymdastyrý jáne ótkizý tártibi týraly» zań jobasyn talqylaýǵa arnalǵan dóńgelek ústel otyrysy ótti. Qoǵam qairatkeri jáne jumys tobynyń múshesi Muhtar Taijan talqylaýǵa qatysty pikirimen bólisti, dep habarlaidy QazAqparat.
«Talqylaý formatyna qanaǵattanýshylyq bildiremin. Májilis spikeri talqylaýdy júrgizip, oǵan barlyq óńir qatysty. Bul jaqsy format. Men miting kezinde jýrnalister úshin eshqandai shekteý jasaý kerektigin usyndym. Óitkeni, BAQ týraly arnaiy zań bar. Bul miting kezinde jýrnlaister úshin qandai da bir mindettemeni júkteý úshin jetkilikti. Jýrnalister úshin arnaiy aimaq engizý usynyldy. Menińshe, onyń esh qajeti joq. Jýrnalisterdiń kimmen sóileskisi kelse, sonymen sóilesýge múmkindigi bolýy tiis. Ekinshiden, miting týraly eskertý merzimin 15 kúnnen 10 kúnge deiin qysqartý qajet. Al piket úshin eskertýdi múldem alyp tastaý kerek», - dedi Muhtar Taijan.
Onyń atap ótýinshe, beibit jinalystar úshin mamandandyrylǵan oryn engizýge qatysty qyzý pikirtalas boldy.
«Menińshe, miting ótkizýge bolmaityn jerlerdi aiqyndaý qajet. Máselen, olar: kópirler, qarý-jaraq qoimasy, áskeri baza nemese bóget. Bul jerlerde tehnologiialyq qaýipke bailanysty ótkizýge bolmaidy. Qalǵan barlyq buqaralyq jerler miting ótkizý úshin ashyq bolýy tiis. Ádilet ministrligi Marat Beketaev óte jaqsy mysal keltirdi. AQSh-ta Kapitoliia men Aq úi tóńiregi jasyl jáne qyzyl aimaqqa bólingen. Ereýilshiler nemese sherýshiler atalǵan ǵimarattardyń jumys isteýine kedergi keltirmeýleri tiis ekendigi túsinikti. Biraq, ol jaqqa jasyl aimaq bar. Ol jerde ereýilge shyǵýǵa jinalýǵa bolady. Olar Free speech zone dep atalady. Menińshe, bul jaqsy tájiribe jáne biz ony ony alýymyz kerek. Eger Parlament mańynan qandai da bir aimaq belgilep, eshkimge bóget jasamai jinala alatyn bolsaq nege jasamasqa»,- dedi spiker.
Muhtar Taijan jýrnalister nazaryn zań jobasyn talqylaýǵa arnalǵan jiynnyń 2 saǵattan astamǵa sozylǵanyna da aýdardy.
«Ózderińizde kórip otyrǵandai 2,5 saǵat boiy talqylap jatyrmyz. Jiyndy Májilis tóraǵasy júrgizip, jumys toptarynyń basshylary, komitet tóraǵalary, ministrler, ministr orynbasarlary, QR Bas prokýrorynyń orynbasary qatysýda. Árine, olar bizdiń pikirimizdi estidi. Óńirler de qatysyp, óte jaqsy usynystar bedi. Biz bul zań jobasynyń árbir babyn tyńǵylyqty qarap shyǵamyz dep oilaimyn. Men jumys tobyna Erlan Qaliev, Marjan Aspandiiarova, Erlan Nurpeiisov syndy belsendilerdi qosýdy usyndym. Olar ártúrli qalada turady. Olar árbir otyrysqa qatysa almaǵan kúnniń ózinde men olardyń pikirlerin jariia etip otyratyn bolamyn», - dedi ol.
