Otyrar aýdanynyń Jańa Shilik aýylynda Qazaqstannyń Halyq jazýshysy, aqiyq aqyn Muhtar Shahanovtyń shyǵarmashylyq úii ashyldy.
2-shilde kúni Muhań 76 jasqa toldy. Jańa Shilikte ashylǵan shyǵarmashylyq úii aqynnyń týǵan kúnine arnalǵan keremettei tartý boldy. Saltanatty jiynǵa otyrarlyqtardan bólek, Túrkistan oblysy ákimdiginiń, ziialy qaýymnyń, aqparat quraldarynyń ókilderi, basqa da adamdar qatysty. Aqynǵa zor qurmet kórsetilip, syi-siiapattar tapsyryldy.
Osynda jinalǵan ónerpazdar Muhańnyń óleńderin oqydy, ol kisiniń ánderin oryndady. Sondai-aq jiynǵa qatysýshylar aqynnyń «Otyrar dastany» shyǵarmasynyń jelisimen túsirilgen animatsiialyq filmdi tamashalady. Qonaqtar arnaiy tigilgen kiiz úidegi dastarhannan dám tatyp, aqynǵa degen izgi tilekterin bildirdi.
Bul jiyn óte áserli ótti. Muhań óz ómirinen estelikter aitty, jinalǵan halyqqa rizashylyǵyn bildirdi, ǵimarattyń salynýyna qarjylai demeýshilik etken belgili kásipker Serikjan Seiitjanovqa alǵysyn jetkizdi.
M.Shahanovtyń shyǵarmashylyq úii eki qabatty bolyp, erekshe dizainmen salynǵan. Onyń ishi de keremet bezendirilgen. Onda kitaphana, shyǵarmashylyqpen ainalysatyn jumys kabinetteri, demalys bólmeleri jáne qonaq qabyldaityn bólmeler bar. Bári de zamanaýi úlgide jabdyqtalǵan. Ǵimaratqa kirgender onda qoiylǵan sýretter men qujattar arqyly aqiyq aqynnyń búkil ómir jolymen derlik tanysa alady.
...Osy oraida biz Muhańdy mereili merekesimen shyn júrekten quttyqtaimyz! Shyǵarmashylyǵyńyz sharyqtai bersin, elge bererińiz sarqylmasyn, qurmetti Muhtar aǵa!
R. QYDYR
«Zamana» gazeti
