Almaty ákimi Baqytjan Saǵyntaev «Qazaq SSR Tilder týraly» alǵashqy Zańnyń qabyldanǵanyna 30 jyl tolýyna orai bir top ziialy qaýym ókilimen kezdesti, dep habarlaidy "Ult aqparat".
Baqytjan Saǵyntaev memlekettik tildiń damýyna úles qosqan jazýshy, jýrnalist, ǵalym jáne qoǵam qairatkerlerine Memleket basshysynyń alǵys hatyn tapsyrdy.
Olardyń arasynda «Memlekettik tilge qurmet» qoǵamdyq birlestiginiń tóraiymy Asyly Osman, Halyqaralyq «Qazaq tili» qoǵamynyń prezidenti Ómirzaq Aitbaev, M. Áýezov atyndaǵy Ádebiet jáne óner institýtynyń direktory Kenjehan Matyjanov, jazýshy Smaǵul Elýbaev, A. Baitursynov atyndaǵy Til bilimi institýtynyń bas ǵylymi qyzmetkeri Telhoja Januzaqov, halyq jazýshysy Muhtar Shahanov, A. Baitursynov atyndaǵy Til bilimi institýtynyń direktory Erden Qajybek, Qazaqstan Jazýshylar Odaǵy tóraǵasynyń orynbasary Mereke Qulkenov, Ulttyq aýdarma biýrosynyń redaktory Nazgúl Qojabekova, jazýshy-pýblitsist Jumash Kenebai, «Jas qazaq» gazetiniń bas redaktory Smaiyl Sraiyl bar.
Kezdesý barysynda jinalǵandar memlekettik tildi odan ári damytý, ony qala jurty arasynda dáripteý máselelerin talqylap ózara pikir almasty.
Sonymen qatar, qala mektepteriniń kitaphanalaryn qazaq jazýshylarynyń kitaptarymen toltyrý jáne internet bazasyn qazaq tildi kontentpen tolyqtyrý usynyldy.
