Senator Muhtar Qul-Muhammed Eýraziialyq ekonomikalyq odaqtyń problemalaryn kóterdi. Onyń aitýynsha, Qazaqstan taýarlaryn Reseidiń federaldyq sheneýnikteriniń qazaqstandyq kásipkerlerdi shekteýi azaimai tur, dep habarlaidy QazAqparat.
«Bul - bizdiń Elbasynyń bastamasymen qurylǵan óte qajet ekonomikalyq, taýarlardy syrtqa shyǵarýǵa múmkindik beretin, integratsiiany kúsheitetin odaq. Sóite tura bul odaqtyń problemasy azaimai otyr. Dál osy zalda Senat tóraǵasy bolyp otyrǵan kezde Qasym-Jomart Kemeluly Syrtqy ister ministrligine birneshe eskertý jasaǵan edi. Atap aitar bolsaq, onyń ishinde mynaý odaqtaǵy túrli hattamalarǵa jii-jii ózgerister engizile beredi. Qajetti bolsa da, bolmasa da... Túsirilgen ózgerister eki eldiń Parlamentiniń qos palatasy qarap, olarǵa biz únemi tolyqtyrýlar engizip otyramyz. Sóite tura Qazaqstannyń kórshi elderge shyǵarylatyn taýarlaryn sol eldegi federaldyq sheneýnik dárejesindegi adam toqtatyp tastaidy», - dedi senator Senat otyrysynda.
Onyń aitýynsha, eki memlekettiń basshysy qol qoiatyn bolsa, eki eldiń Parlamenti qaraityn bolsa, ony bir federaldyq sheneýnik toqtatyp tastasa, «munyń qandai zań bolǵany».
Bul suraqqa jaýap bergen Syrtqy ister ministriniń orynbasary Marat Syzdyqov atalmysh máselege Saýda jáne integratsiia ministrligi jaýapty ekenin aityp ótti.
«Olar – eýraziialyq integratsiiany júrgizetin jetekshi organ. Biz EAEO-nyń jumysynyń saiasilanyp ketpeýine jaýaptymyz. Integratsiia jáne ekonomikalyq odaq máselesi – tiri protsess. Keibir máselelerdi aldyn ala bilý múmkin emes. Jumys jáne kelissóz barysynda qashan da jańa jaǵdailar paida bolyp, zańǵa qandai da bir ózgeristerdi engizýdi talap etip jatady», - dedi ol.
