Muhtar Áýezov atyndaǵy Qazaq ulttyq teatry ujymynyń Aqmola oblysynda gastroldik sapary máresine jetti. Osyǵan orai, atalmysh teatr ártisteri aqmolalyq kórermendermen kezdesti, dep habarlaidy QazAqparat.
Asanáli Áshimov bastaǵan teatr ujymy qyrkúiektiń 23-28 aralyǵynda aqmolalyqtarǵa eń úzdik spektaklderin usyndy.
Teatr festivaliniń shymyldyǵy jazýshy, dramatýrg, Memlekettik syilyqtyń laýreaty Dýlat Isabekovtiń «Jaýjúrek» dramasymen ashyldy. Kartina belgili ánshi-kompozitor, seri, Balýan Sholaqtyń ómiri men shyǵarmashylyǵyna arnalǵan. Kelesi kúnderi jazýshy, dramatýrg, Memlekettik syilyqtyń laýreaty Tynymbai Nurmaǵanbetovtiń «Bes boidaqqa bir toi» komediiasy, dramatýrg Aleksandr Volodinniń «Qoshqym kelmeidi» dramasy, aqyn, dramatýrg Israil Saparbaidyń «Syǵan serenadasy» miýzikli, jazýshy, dramatýrg, Memlekettik syilyqtyń laýreaty Dýlat Isabekovtyń «Júz jyldyq mahabbat» dramasy kórsetildi. Búgin, sońǵy kúni Abaidyń qara sózderi boiynsha «Qara» dramasymen máresine jetedi.
Osyǵan orai, M.Jumabaev atyndaǵy Aqmola oblystyq ámbebap ǵylymi kitaphanasynda atalmysh teatrdyń tanymal akterleri Bekjan Turys pen Dýlyǵa Aqmolda aqmolalyq kórermenderimen kezdesip, Kókshetaý qalasynda ótken gastroldik týr týraly óz áserlerimen bólisti, sahnada olarmen bolǵan qyzyqty oqiǵalardy aityp, stýdentterdiń suraqtaryna jaýap berdi.
«Biyl teatrymyzdyń gastroldik týry elimizdiń Táýelsizdik mereitoiy qarsańynda Kókshetaý qalasynan bastaldy. Ókinishke orai, bes kún zýlap ótip, óńirge gastrolimizdi búgin aiaqtaimyz. Biz oblys pen qala basshylyǵyna jyly shyraimen qarsy alǵany jáne qonaqjailylyǵy úshin óte rizamyz. Stýdenttermen – bolashaq akterlermen jáne rejisserlermen búgingi kezdesý joǵary deńgeide ótti. Búgin biz Qazaqstanda tanymal rejisser Juldyzbek Jumabaidyń Abai Qunanbaevtyń 175 jyldyǵyna arnalǵan «Qara» filosofiialyq spektaklin qoiyp, erteń Petropavl qalasyna attanamyz», - dedi bólisti teatr jáne kino akteri Dýlyǵa Aqmolda M.Jumabaev atyndaǵy Aqmola oblystyq ámbebap ǵylymi kitaphanasynda ótken kezdesýde.
Sonymen birge, kezdesýde búgingi ómirdi kórsetetin qyzyqty ári kórkem mazmundaǵy teatr spektaklderin tamashalaǵan kórermender rýhani baiyp, kóptegen jaǵymdy emotsiialarǵa ie bolǵany aityldy.
Eske sala keteiik, 23-27 qyrkúiek aralyǵynda Muhtar Áýezov atyndaǵy Qazaq ulttyq teatrynyń akterleri «Kókshetaý» mádeniet saraiynyń sahnasynda eń tabysty jáne kórermender arasynda suranysqa ie qoiylymdardy qoidy.
