Foto: Almaty.tv
«Meniń 12 jyl ómirim jienim úshin shetelde ótti». Óz erkimen elge oralǵan Ábliazovtyń sybailasy ári naǵashy aǵasy Qýanysh Nurǵazin osylai dedi. Densaýlyǵynan aiyrylǵan ol ózge elde jylyna birneshe ret aýrýhanaǵa jatqanyn da jetkizdi, dep habarlaidy Almaty.tv.
73 jastaǵy Qýanysh Nurǵazin esimdi bul kisini Muhtar Ábliazov 2007 jyly «BSC» JShS-nyń nominaldy direktory etip taǵaiyndaidy. Bas prokýratýranyń málimetine sáikes, Ábliazov jáne onyń sybailastary osy kompaniiany zańsyz nesielendirý arqyly BTA bankten asa iri kólemde qarajat jymqyrǵan. Quzyrly organ ókilderi Nurǵazin sol kezde bul iske qatysy bola tura eshqaida ketpeý týraly mindettemeni buzyp, qylmystyq jaýapkershilikten jaltarý úshin sottan jasyrynǵanyn aitady. Osylaisha ol 2012 jyly Qazaqstannan Litvaǵa ketip, 12 jyl boiy ózge elde bosqyn mártebesimen júrgen.
"2007-2009 jyldar aralyǵynda BSC kompaniiasynyń direktory boldym. Biz - BSC kompaniiasy 152 mln teńge nesie alǵanbyz. Maǵan "nesie alǵanda sybailas boldyń" degen aiyp taǵylyp otyr", – dedi kúdikti.
Sot Nurǵazindi Muhtar Ábliazovtiń sybailasy dep tanyp, onyń ústinen bólek qylmystyq is qozǵaidy. BSC kompaniiasynyń direktory qyzmetinde ǵana tirkelgen ol istiń osylaisha nasyrǵa ulasyp keterin bilmegenin aitty.
"Men izdeýde júrgenimdi bilgen joqpyn. 2014 jyly aýrýhanadan shyǵyp kele jatqanymda politsiia ustady. Sol kezde túsindim. Maǵan «bosqyn» degen ataq berdi. Osy ýaqytqa deiin Litvada boldym", – dedi Qýanysh Nurǵazin.
Ózge elde júrip, densaýlyǵy kúrt nasharlaǵan. Birneshe kúrdeli ota jasalǵan. Sozylmaly aýrýǵa shaldyqqan. Muny ol suhbat barysynda aitty.
Al sońǵy 5 jylda jienimen bailanysy úzilgendikten, qarjylai qoldaý da bolmaǵan kórinedi. Aita keteiik, ol Qazaqstanǵa kelý úshin Litvanyń saiasi qamqorlyǵynan da bas tartqan eken.
"Meniń 12 jyl ómirim jienim úshin shetelde ótti. Ol jerde esepte turdym. Jylyna eki ret aýrýhanaǵa jattym. Densaýlyǵyma bailanysty kóp ózgeris boldy. Júrekten eki ret infarkt aldym. Býyndarymdy aýystyrdy, eki iyǵym jyǵylǵannan úzilip ketip, tiktirdim. Shetelde ótken 11 jyl ómirim sol balaǵa bailanysty boldy", – deidi kúdikti.
Arada osynsha ýaqyt ótkennen keiin Nurǵazin Otanyna óz erkimen kelýdi uiǵarypty. Onyń elge qaitýyna Qazaqstandaǵy demokratiialyq ózgerister sebep bolǵan. Endigi ómirin týǵan jerinde balalary men nemereleriniń qasynda ótkizýdi josparlap otyr. Ol 24 shildede ushaqpen Litvadan Stambýl arqyly Almaty halyqaralyq áýejaiyna kelip qonǵan.
"Eshqashan saiasatqa aralaspadym. Men oǵan «sen aralas, aralaspa» dep aita almaimyn. Ol meni tyńdamaidy. Meniń erkim ózimde. Jańa Qazaqstan dep jatyr ǵoi, demokratiialyq ózgerister bolady dep senemin. Sondyqtan elge, jurtqa qaitýdy sheshtim. Men shetelde júrgen qashqyndarǵa sottyń ádil sheshimi bolatynyn aitqym keledi. «Otan ottan da ystyq». Sondyqtan qaitý kerek dep esepteimin", – dedi Nurǵazin.
Aita keteiik, Qýanysh Nurǵazin áýejaidan túse sala ýaqytsha ustaý izoliatoryna qamaýǵa alynǵan bolatyn. Qazir sot sheshimimen 2 ai merzimge úiqamaqqa aýystyryldy. Quzyrly organ tergeý jumystary jalǵasyp jatqanyn habarlady. Aldaǵy ýaqytta sot talqylaýy qaita bastalady. Endi onyń qandai jaza arqalaitynyn sot aiqyndaidy.
video: Almaty TV News/Youtube
