© AFP 2022 / THOMAS COEX
Qazaqstan Frantsiiada júrgen eks-bankir Muhtar Ábliazovti elge ekstraditsiialaý boiynsha jumysty jalǵastyryp jatyr. Bul týraly Bas prokýrordyń orynbasary Jandos Ómiráliev málimdedi, dep habarlaidy Sputnik Qazaqstan.
Jýyrda Frantsiia soty Muhtar Abliazovqa saiasi baspana berýden bas tartqan bolatyn. Májilis kýlýarynda jýrnalister Ómirálievten "osyǵan bailanysty Qazaqstan qashqyn eks-bankirdi elge ekstraditsiialai ma?" dep surady.
Bas prokýrordyń orynbasary Qazaqstannyń qýdalaý organdary Ábliazovqa qatysty 2 qylmystyq is qozǵaǵanyn eske saldy. Birinshisi – BTA banktiń qarajatyn jymqyrýǵa qatysty. Ekinshisi – Tatishevtiń ólimine bailanysty.
"Eki qylmystyq is boiynsha aiyptaý úkimi kúshine engennen keiin, ekstraditsiia boiynsha biz Frantsiianyń ókiletti organdaryna suranys hattar joldadyq. Árine, olardyń qaralý satysy ártúrli merzimde. Qazirgi tańda Frantsiianyń ókiletti organdary Ábliazovtiń statýsynyń kúshin joidy. Osy jáne basqa da biz qoldanyp otyrǵan sharalar septigin tigizedi (elge ekstraditsiialaýǵa – Sputnik) dep oilaimyn. Suranys hattar bizdiń baqylaýymyzda", - dedi Ómiráliev kýlýarda.
"Iaǵni, Qazaqstan Muhtar Ábliazovty ekstraditsiialaý boiynsha jumysty júrgizip jatyr ǵoi" dep naqtylady BAQ ókilderi.
"Árine, bul jumys toqtatylmaidy. Osy jańalyqtyń ózi de - tek Qazaqstan emes, álemdegi barlyq quqyq qorǵaý organdary jumysynyń nátijesi. Biz bar kúshimizdi salamyz", - dep sendirdi Bas prokýrordyń orynbasary.
Aita keteri, Muhtar Ábliazov Parijde on jyldai turady.
