Taiaýda ǵana qoǵamdyq talqylaýǵa usynylǵan latyn grafikasyna negizdelgen jańa qazaq álipbii "sońǵy nusqa" emes. Bul týraly búgin memlekettik tildiń latyn grafikasyndaǵy álipbiiniń biryńǵai standartyn engizý máselelerine arnalǵan dóńgelek ústel otyrysynda elimizdiń Mádeniet jáne sport ministri Arystanbek Muhamediuly aitty, dep habarlaidy QazAqparat.
«Búgin biz Elbasy Nursultan Nazarbaevtyń «Bolashaqqa baǵdar: rýhani jańǵyrý» baǵdarlamasynyń aiasynda kórsetilgen eń birinshi mindet, iaǵni latyn álipbiine kóshý jumystaryn bastaý jónindegi tapsyrmasyna bailanysty jinalyp otyrmyz. Sonaý Táýelsizdik tańynan bastap, biz bul máselege erekshe daiyndaldyq. Endi mine, syndarly shaq týǵanda halqymyz úshin, onyń eń asyl qazynasy tilimiz úshin asa ózekti jumysty jumyla atqarýdyń bastaýynda turmyz. Jańa álipbi kópshilik, ziialy qaýym, sarapshylar aityp jatqandai jańǵyrýdyń eń mańyzdy alǵysharttarynyń biri. Dáýir suranystarynan, zamana qajettiliginen jáne keleshegimizdiń qamyna orai álem halqynyń jartysynan astamy qoldanatyn, qazirgi kezeńde shyn mánindegi halyqaralyq álipbige ainalǵan latynǵa kóshý Elbasy aitqandai, tereń logikasy bar mańyzdy qadam. Bul tarapta Mádeniet jáne sport ministrligi birqatar shara atqardy. Bul másele Tilderdi qoldaný jáne damytýdyń 2011-2020 jyldarǵa arnalǵan baǵdarlamasynda qazaq jazýyn odan ary jetildirý dep kórsetilgendigin de jaqsy bilesizder», - dedi ministr.
Osy rette ol 11 qyrkúiekte Parlamentte memlekettik tildiń latyn grafikasyndaǵy álipbiiniń biryńǵai standartyn engizý máselelerine arnalǵan birinshi parlamenttik tyńdaý ótkendigin, atalǵan sharaǵa qatysýshylar ony biraýyzdan qoldaǵandyǵyn atap ótti.
«Qazirgi ýaqytta latyn álipbiindegi qazaq tiliniń nusqasy usynyldy. Bul talqylaýǵa arnalǵan, túbegeili nusqa emes. Ony qazir bekitip jatqanymyz joq. Árine, 18 mln adamnyń 18 mln pikiri bar. Sondyqtan jan-jaqty, tyńǵylyqty talqylaiyq», - dedi Arystanbek Muhamediuly.
