Búgin Parlament Májilisinde týristik salany damytýǵa arnalǵan Úkimet saǵatynda Mádeniet jáne sport ministri Arystanbek Muhamediuly elektrondyq viza tetigi qashan engiziletinin aitty, dep habarlaidy "Ult aqparat".
«Qazaqstanǵa týristik aǵymdardyń artyp otyrǵanyna bárimiz kýágermiz, ol EXPO-2017 ótken jyldaǵy joǵary bazanyń aiasynda tarihi qubylys bolyp tabylady. Qańtar-maýsym ailarynda byltyrǵy jyldyń osyndai kezeńimen salystyrǵanda kelý týrizmi 22 paiyzǵa ósip, 4,2 mln adamǵa jetti. Al otandyq týrizm 7 paiyzǵa artqanyn maqtanyshpen aitamyz», - dedi ministr.
A. Muhamediuly, saiasi turaqty jáne damyǵan 64 eldiń azamattary týristik jáne basqa maqsattar úshin Qazaqstanǵa vizasyz kirýge quqyly ekenin eske salyp ótti.
«2018 jyldyń sońyna deiin Almaty men Astana qalalary arqyly Qytai men Úndistan azamattary úshin 72 saǵattyq vizasyz tranzit engizildi. Nátijesinde, Qazaqstannan Qytaiǵa tranzit aǵymy 60 paiyzǵa ósti, qalaǵa 17 myńnan astam sheteldik keldi. Jyl sońyna deiin Astana men Almaty áýejailarynda qanatqaqty rejimde 128 memleket azamattaryna, sonyń ishinde Úndistan, Qytai, Iran, Parsy shyǵanaǵy elderine arnalǵan elektrondyq viza tetigi iske qosylatyn bolady. Ókinishke qarai, búkil dúniejúzi elektrondyq vizamen jumys istep jatqanda, biz áli de kezekke turyp, qolmen toltyryp jatyrmyz. Bul vizany alý merzimin bes kúnge qysqartady jáne protsesti edáýir jeńildetedi», - dedi vedomstvo basshysy.
Onyń atap ótýinshe, Ózbekstanmen shekaralyq týristik marshrýttardy ilgerletý úshin «Silk Way Visa» aiasynda vizalardy ózara taný mehanizmi talqylanýda. Qazaqstan-Qyrǵyzstan memlekettik shekarasynda ýaqytsha týristik ótkelderdiń ashylýyna jáne tikushaq parkiniń qyzmet kórsetýine bailanysty Qazaqstan 17 jyl ishinde alǵash ret Ortalyq Tian-Shanda strategiialyq artyqshylyqqa ie boldy.
