Qostanai oblysynyń ákimi Arhimed Muhambetov «QazAgro» holdingi qarjy institýttary aldyndaǵy mindettemeni 2020 jyldyń jeltoqsanyna deiin uzartýǵa múmkindik bergenin málim etti, dep habarlaidy "Ult aqparat".
«Biyl jazdyq egis kólemi 4,7 mln ga qurady. Dándi daqyldarmen - 4 mln ga jýyq, onyń ishinde 3,3 mln ga - bidai egistigimen qamtylǵan. Egis alqaptarynyń qurylymyn ártaraptandyrýdy jalǵastyrý sheńberinde maily daqyldar egistigi 510 myń gektarǵa deiin ulǵaityldy. Egin jinaý jumystarynyń qorytyndysy boiynsha 3 mln tonna astyq bastyryldy. Jinalǵan astyq kólemi sharýashylyqtarǵa birinshi kezektegi qajettilikti jabýǵa, mal qystatýdy júrgizýge, aldaǵy jyldyń egis jumystaryna daiyndalýǵa múmkindik beredi. Bul rette tuqym tolyq kólemde qambaǵa quiyp alyndy», - dedi Arhimed Muhambetov OKQ-da ótken baspasóz máslihatynda.
Ákimniń aitýynsha, qurǵaqshylyqtan zardap shekken sharýashylyqtarǵa memlekettik qoldaý kórsetilgen.
«QazAgro» holdingi qarjy institýttary aldyndaǵy mindettemelerdi 2020 jyldyń jeltoqsanyna deiin uzartýǵa múmkindik berdi. Kóktemgi egis jáne egin jinaý jumystaryn júrgizýge alynǵan kreditter, tehnika lizingi, mal sharýashylyǵyn damytýdyń salalyq baǵdarlamalary boiynsha tólemderge jeńildik jasaldy. Oblystyń 4 qalasy men 6 aýdanynda táýligine - 22,4 tonna, aiyna - 673 tonna qalyptyq nandy pisirýge arnalǵan unǵa qajettiliktiń táýliktik normasymen 25 naýbaihana qamtyldy. Qurǵaqshylyq aimaǵyna kiretin qalalar men aýdandardyń ákimdikteri nan baǵasyn ustap turý boiynsha úshjaqty memorandým jasasty. Qurǵaqshylyqqa ushyramaǵan aimaqtardyń ákimdikteri (8 aýdan) naýbaihanalarmen ekijaqty memorandýmǵa qol qoidy», - dedi ol.
