Almatyda ótip jatqan ekinshi halyqaralyq jazýshylar forýmynda Mońǵol elinen kelgen Sedoogiin Hadaa, kórkem aýdarmaǵa qatysty óz oiyn aitty, dep habarlaidy QazAqparat.
Mońǵol elinen kelgen jazýshy Sedoogiin Hadaanyń pikirinshe, kórkem aýdarma álemdik problema. Aýdarmanyń ózi syn, qiyn, kúrdeli másele. Kórkem aýdarma ýaqytpen keńistik kólemin qamtidy, tildiń óz sheginen shyǵýdy bildiredi.
«Shyn mánisinde shynaiy kórkem aýdarma - ol aýdarmanyń óziniń sheginen shyǵý. Bir tilden basqa tilge, bir elden basqa elge, bir mádenietten basqa mádenietke shyǵý. Biraq bul jái ǵana mátin trasplantatsiialaý emes. Kórkem aýdarma meniń oiymsha elektrondyq júieni qabyldamaidy»,-dedi Mońǵol jazýshysy Sedoogiin Hadaa.
Onyń aitýynsha, qazir álem boiynsha jazýshylar men oqyrmandar zardap shegýde. Ár eldiń klassik jazýshylarynyń shyǵarmalaryn mán-maǵynasy joq áńgimeler men óleńder basyp barady. Muqabasy ádemi bezendirilgen, alaida ishinde ilip alar dúniesi joq kitaptar qaptap ketti. Internet keńistigi de ádebietke óz kesirin tigizip jatyr.
«Bul aqiqat. Moiyndaýymyz kerek. Alaida ár problemanyń sheshimi bolady. Búgingi forým osynyń bir aiǵaǵy. Qalamgerler basqosýy ádebiet áleminde halyqaralyq baǵaǵa ie bolatynyna men senemin» - deidi Sedoogiin Hadaa.
Buǵan deiin, jazýshy Smaǵul Elýbai Qazaqstanda ádebi agent júiesin qurý týraly sóz qozǵady.
Memleket jáne qoǵam qairatkeri Oljas Súleimenov Beiimbet, Sáken, Iliias, Mirjaqyptardyń shyǵarmasyn shet tiline aýdarý kerektigin aitty.
Eske sala ketsek, Almatyda halyqaralyq jazýshylar forýmy ótip jatyr. Oǵan 18 memleketten 81 delegat qatysýda.
