2021 jyldyń 6 aiynda múgedek balasy bar otbasylarǵa 27,2 mlrd teńge járdemaqy aýdaryldy. Bul týraly QR Eńbek jáne halyqty áleýmettik qorǵaý ministrligi Áleýmettik kómek saiasatyn damytý departamentiniń direktory Asqar Niiazov aitty, dep habarlaidy QazAqparat.
«Melekettik biýdjetten múgedektigi bar balalardy qosymsha qoldaý is-sharalary qarastyrylǵan. Kámelettik jasqa tolǵanǵa deiin kútim jasaý úshin járdemaqy tóleý kózdelgen. Járdemaqy mólsheri búgingi tańda 48 023 teńgeni qurap otyr. Osy jyldyń 6 aiynyń ishinde 92 259 otbasyǵa 27,2 mlrd teńge mólsherinde járdemaqy tólendi. Osyndai qosymsha kómektiń biri múgedek bala kámelettik jasqa tolǵannan keiin de tólenedi. Iaǵni sábi kezinen 1-toptaǵy múgedek balaǵa 18 jastan asqannan keiin de atalǵan járdemaqy jalǵasady. Onyń kólemi de 48 023 teńge quraidy. Bul járdemaqyny qazirgi ýaqytta 15 038 otbasy aldy. Osy jyldyń 6 aiynda tólengen járdemaqynyń jalpy somasy 4,4 mlrd teńge boldy», - dedi ol Ortalyq kommýnikatsiialar qyzmetindegi brifing barysynda.
Sonymen qatar departament basshysy jumys isteitin áielderge Memlekettik áleýmettik saqtandyrý qory arqyly jumys berýshi aýdarǵan qarajat esebinen tólenetin tólemniń bar ekendigin aitty.
Ol - júktilikke jáne bala bosanýyna bailanysty tabysynan aiyrylýyna orai 1 jyl beriletin áleýmettik tólem. Júktilikke bailanysty tólenetin járdemaqynyń qazirgi ýaqyttaǵy ortasha kólemi 540 myń teńgeni qurap otyr. 2020 osy maqsatqa 96,4 mlrd teńge kóleminde Memlekettik áleýmettik saqtandyrý qorynan qarajat tólendi. Bala týǵannan keiin Memlekettik áleýmettik saqtandyrý qorynan tólenetin tólemder bala 1 jasqa tolǵanǵa deiin júrgiziledi. Ótken jyldyń qorytyndysynda mundai tólemdi 106,4 mlrd teńge kóleminde 501 myńnan astam azamatsha aldy. Qazirgi ýaqytta bul járdemaqynyń ortasha kólemi 31 myń teńgeni qurap otyr. Biyl joǵaryda atalǵan eki áleýmettik tólem úshin Memlekettik áleýmettik saqtandyrý qorynan 253,8 mlr teńge qarastyrylyp otyr», - dedi Asqar Niiazov.
