QR Prezidenti Ákimshiliginiń qoǵamdyq qabyldaýyna jii joldanatyn suraqtardyń biri múgedekterdiń jáne múgedek balasy bar otbasylardyń jeńildikpen páter alýyna qatysty bolyp otyr. Osyǵan orai, QR Prezidenti Ákimshiliginiń qoǵamdyq qabyldaýy Telegram-kanalynda atalǵan sanattaǵy azamattardyń jeńildikpen baspana alý joldary túsindirildi, dep habarlaidy "Ult aqparat".
«Eger barlyq protsedýrany durys ótse, birneshe jyldyń ishinde turǵyn úi problemasyn sheshýge múmkindik bar. Múgedekterdi, múgedek balalary bar nemese ony tárbielep otyrǵan otbasyn turǵyn úimen qamtamasyz etýdiń eki quraly bar. Birinshiden, qajetti qujattardy jinap, jergilikti atqarýshy organǵa júginý kerek. Olar qujattardy qabyldap, esepke qoiady jáne turǵyn úige muqtaj múgedekterge kezek tártibimen ákimshilik baspana usynady», - delingen Telegram-kanaldaǵy aqparatta.
Ekinshi quralyna sáikes atalǵan sanattaǵy azamattar úshin jeńildetilgen tártippen baspana satyp alýǵa jyldyq mólsherlemesi 2 paiyzben 20 jylǵa ipotekalyq zaim usynylady. Bul rette Qazaqstannyń «Turǵynúiqurylysjinaqbankinde» bastapqy jarna jinaǵan azamattarǵa 20 jylǵa deiin jyldyq mólsherlemesi 2 paiyzdan aspaityn aldyn ala jáne aralyq turǵyn úi zaimyn beredi. Atalǵan sanattaǵy azamattarǵa jylyna 6 myńǵa jýyq jeńildetilgen zaim berý josparlanǵan.
«Joǵaryda atalǵan sanatqa jatatyn azamattarǵa kezekke turýǵa arnalǵan qujattaryn der ýaqytynda jáne durys tapsyrý qajettigin taǵy da bir márte eske salamyz», -dep atap ótedi qoǵamdyq qabyldaý.
