QR Eńbek jáne halyqty áleýmettik qorǵaý vitse-ministri Erlan Áýkenov múgedektigi bar adamdardy memlekettiń saiasi ári qoǵamdyq ómirine tartý boiynsha atqarylyp jatqan jumystar jaiynda aitty, dep habarlaidy QazAqparat.
«Ózderińiz bilesizder, ómir súrý sapasyn jaqsartý men azamattar quqyqtaryn júzege asyrýdyń negizgi baǵyttary 2025 jylǵa deiingi Ulttyq josparmen bekitilgen. Onda eskerilgen sharalar Qazaqstandaǵy barsha múmkindigi shekteýli jandardyń máselesin qamtyp otyr. Bul turǵyda 700 myńnan astam eskerilgen», - dedi E. Áýkenov «Múgedektigi bar adamdardyń saiasi jáne qoǵamdyq ómirge qatysýlary» atty dóńgelek ústel otyrysynda.
Onyń aitýynsha, jospardyń sharalaryn oryndaý máselesi 17 qyrkúiekte múgedekterdi áleýmettik qorǵaý salasyn jaqsartý máselesi boiynsha Úilestirý keńesinde qaraldy.
Osy oraida alǵash ret Úilestirý keńesiniń músheleri internet-daýys berý arqyly sailandy. Daýys berýge 22 myńnan astam adam qatysqan edi.
E. Áýkenovtyń paiymynsha, bul óz kezeginde múmkindigi shekteýli jandardy eldiń saiasi ómirine tartýda jaqsy qadam boldy.
«Meniń oiymsha, bul sharalar múgedektigi bar adamdardyń ómir súrý sapasyn jaqsartý boiynsha saiasatty aiqyndaýdaǵy mańyzdy sheshim jasaityn organdarda óz ókilderin tańdaý kezindegi jaqsy qadam bolyp otyr», - dedi vitse-ministr.
Budan buryn habarlanǵandai, QR Eńbek jáne halyqty áleýmettik qorǵaý ministrligi 2021 jylǵy 10 qańtarda ótetin Parlament Májilisi men máslihat depýtattarynyń sailaýynda múgedektigi bar adamdar úshin qoljetimdi ortany qamtamasyz etý maqsatynda aýmaqtyq sailaý komissiialary úshin birqatar usynymdar ázirledi.
QR Eńbekmini Ortalyq sailaý komissiiasynyń nusqaýlyǵyna sáikes múgedektigi bar adamdar úshin sailaý ýchaskeleriniń qoljetimdiligin qamtamasyz etýdi usynady. Atap aitqanda, pandýstar, shaqyrý knopkalaryn, taktildi plitkalar, monitory bar kompiýterler, qosymsha jaryqtandyrý, trafaretter jáne t. b. ornatýdy qamtamasyz etý qajet. Budan basqa, onlain-sýrdoaýdarma nemese ymdaý tili mamandarynyń kezekshiligi usynylady.
Sonymen qatar, sailaý ýchaskeleri ǵimarattyń birinshi qabatynan joǵary ornalasqan jaǵdaida múgedektigi bar adamnyń arbasyna arnalǵan arnaiy lift bolýy kerek.
