Aǵymdaǵy jylǵy 1 qazandaǵy jaǵdai boiynsha jumyspen qamtýdy qoldaý sharalary 15,4 myń múgedektigi bar adamǵa kórsetildi, dep habarlaidy QazAqparat QR Eńbek jáne halyqty áleýmettik qoldaý ministrliginiń baspasóz qyzmetine silteme jasap.
Onyń ishinde Nátijeli jumyspen qamtýdy jáne jappai kásipkerlikti damytýdyń 2017 – 2021 jyldarǵa arnalǵan «Eńbek» memlekettik baǵdarlamasy (budan ári – «Eńbek» memlekettik baǵdarlamasy) boiynsha 11,4 myńnan astam adam, al Jumyspen qamtýdyń 2020 jylǵa arnalǵan jol kartasy (budan ári – JQJK) sheńberinde 2,2 myń adam qoldaý aldy.
«Eńbek» memlekettik baǵdarlamasyna 11,4 myń múgedektigi bar adam qatysty, onyń 4 myńy turaqty jumys oryndaryna, 6 myńnan astamy ýaqytsha jumystarǵa ornalastyryldy, 448 azamat qysqa merzimdi kásiptik oqytýmen qamtyldy, 284 adam mikrokreditter aldy jáne 700 adam memlekettik granttar aldy. Sondai-aq, «Bastaý biznes» jobasy boiynsha kásipkerlik qyzmet negizderine oqytýǵa 504 adam jiberildi.
Taǵy 2,2 myńǵa jýyq múgedektigi bar adam Jumyspen qamtýdyń jol kartasynyń jobalaryna jumysqa ornalastyryldy.
«JQJK aiasynda júzege asyrylyp jatqan jobalar áleýmettik-mádeni nysandar men turǵyn úi-kommýnaldyq sharýashylyq nysandaryn jóndeý men qaita jańartýdy, injenerlik-kólik infraqurylymyn salýdy jáne eldi mekenderdi abattandyrýdy kózdeidi. Mundai jumystarǵa múgedektigi bar adamdar meditsinalyq qorytyndylarǵa sáikes jiberiledi», – dedi QR Eńbekmini Halyqty jumyspen qamtý departamentiniń eńbek naryǵyn damytý basqarmasynyń basshysy Baqyt Qashyrbekov.
Budan basqa, «Halyqty jumyspen qamtý týraly» Zańǵa sáikes, jergilikti atqarýshy organdar aýyr jumystardy, eńbek jaǵdailary ziiandy, qaýipti jumystardaǵy jumys oryndaryn eseptemegende, jumys oryndary sanynyń ekiden tórt paiyzǵa deiingi mólsherinde múgedektigi bar adamdar úshin jumys oryndaryna kvota belgileýdi qamtamasyz etedi. Kvota sheńberinde 2017 jyldan bastap osy jylǵa deiin 13,6 myń múgedektigi bar adam jumysqa ornalastyryldy, onyń ishinde 1,8 myńy – 2020 jyldyń 2-toqsanynyń qorytyndysy boiynsha.
«2018 jyldan bastap halyqaralyq tájiribe negizinde múgedekterdi jumysqa ornalastyrý úshin arnaiy jumys ornyn jabdyqtaýǵa jumys berýshilerdiń shyǵyndaryn sýbsidiialaý engizildi. Biyl kórý, estý jáne tirek-qimyl apparaty buzylǵan múgedekter úshin 31 arnaiy jumys ornyn qurý josparlanýda», – dep tolyqtyrdy Baqyt Qashyrbekov.
