Bilim jáne ǵylym ministrligi Almaty oblysy Taldyqorǵan qalasyndaǵy №4 mektepte bolǵan keleńsiz oqiǵaǵa qatysty túsinikteme berdi, dep habarlaidy "Ult aqparat".
«11 naýryz kúni biologiia sabaǵynda 2005 jyly týǵan oqýshy muǵalimge balaǵat sózder aityp, qatty daýyspen sóilesken. Muǵalim Taldyqorǵan qalasynyń politsiia bólimine aryz jazdy.
Qazirgi tańda oqýshyǵa qatysty QR ÁQBtK-niń 434-babynyń 1-bóligi (usaq buzaqylyq) boiynsha ákimshilik hattama toltyryldy. Sheshimdi Almaty oblysynyń kámeletke tolmaǵandardyń isteri jónindegi mamandandyrylǵan aýdanaralyq soty qabyldaidy», - dedi ministrliktiń baspasóz qyzmeti.
QR BǴM kámeletke tolmaǵan balalardyń is-áreketi úshin ata-analardyń jaýapkershiligi qarastyrylǵanyn eske salady.
«Osy iske bailanysty oqýshynyń ata-anasyn jaýapkershilikke tartý úshin ákimshilik is qozǵaldy. Sonymen qatar belgilengen tártippen oqýshyny esepke qoiý jáne oǵan psihologiialyq kómek kórsetý týraly másele de qaralady.
Aita keteiik, muǵalimderge degen mundai kózqarasqa jol berilmeidi. Tek muǵalimder ǵana emes, ata-analar da balalarmen qoǵamda ózin qalai ustaý keregi týraly áńgimeler júrgizýi mańyzdy», - delingen BǴM taratqan habarlamada.
