«Jumyspen qamtý jol kartasy aiasynda aýyldarda 80 bilim berý oshaǵy salynady. Bul týraly búgin Úkimet otyrysynda QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy QazAqparat.
«Koronavirýs indeti ekonomikaǵa jáne eńbek naryǵyna áserin tigizýde. Osy turǵyda Úkimet tarapynan qoldanylyp jatqan mańyzdy sharalardyń biri - jańa «Jumyspen qamtý» jol kartasy. Bekitilgen jol kartasynyń negizgi sharttaryn eske salyp ketsek, ol qyzmet kórsetýler jáne paidalanatyn qurylys materialdarynyń 90 paiyzdan kem emesi otandyq óndirýshiler men merdiger bolýy tiis. Qurylyp jatqan jumys oryndarynyń 50 paiyzdan kem emesine Jumyspen qamtý ortalyqtary arqyly jumyssyz júrgen, ásirese jumyssyz jastar tartylýy tiis. Memleket basshysynyń sońǵy bergen tapsyrmalary boiynsha syrtta júrgen jastarǵa jol kartasyna qatysqan jaǵdaida aldyn ala eń tómengi jalaqy kóleminde 2 kóterme jalaqy berip, ár jobada jumysshynyń qaýipsizdigin saqtaý maqsatynda sanitarlyq-epidemologiialyq sharalardy qabyldaýy shart», - dedi ministr.
Onyń dereginshe, ákimder tarapynan jol kartasyna 6 506 joba usynyldy. Onyń ishinde 2703 joba áleýmettik infraqurylymǵa, 1039 turǵyn úi sharýashylyǵy nysandaryna, 1799 joba injenerlik-kólik infraqurylymyn qamtýǵa jáne 695 joba eldi mekenderdi abattandyrýǵa qatysty bolyp otyr. Atalǵan jobalarda barlyǵy 255 myń jumys orny qurylady jáne iske asyrylǵan jobalar aldaǵy ýaqytta ekonomikanyń ártúrli salalarynda 100 myńnan astam turaqty jumys ornyn ashýǵa negiz qalaidy.
«Jol kartada iriktelgen jobalar ýaqytsha jumyspen qamtýmen birge áleýmettik mańyzy bar máselelerdi sheshýge, aldaǵy ýaqytta ekonomikalyq áseri bar mejelik salalardyń damýyna, turaqty jumys oryndaryn qurýǵa yqpal etedi. Máselen, jol kartasy aiasynda bolashaqta áleýmettik aktiv bolyp qalatyn qurylystar - jańa 80 bilim berý oshaǵy salynbaq. Ol óz kezeginde apatty jáne úsh aýysymdyq mektepter máselesin sheshýge, aýyldaǵy balalar úshin bilim alýǵa qoljetimdilikti arttyrýǵa, muǵalimderge 7 myń jańa jumys ornyn ashýǵa múmkindik beredi», - dedi Birjan Nurymbetov.
