«Nur Otan» partiiasynyń quqyqtyq keńes músheleri pedagog mártebesin zańnamalyq turǵydan qamtamasyz etý máselelerin talqylady. Keńeitilgen otyrysqa jetekshi partiianyń basshylary, ustazdar qaýymy men ýákiletti memlekettik organdar ókilderi qatysty, dep habarlaidy "Ult aqparat" uiymnyń baspasóz qyzmetine silteme jasap.
«Nur Otan» partiiasy tóraǵasynyń birinshi orynbasary Baýyrjan Baibek táýelsizdik jyldary Tuńǵysh Prezident Nursultan Nazarbaevtyń basshylyǵymen elimizde 2000-ǵa jýyq jańa mektep jáne 900 balabaqsha ashylǵanyn atap ótti.
Apatty jaǵdaidaǵy mektepter sany sońǵy 5 jylda 4 esege azaidy. Muǵalimderdiń jalaqysy 1997 jyldan beri 17 esege ósken. Elbasynyń tapsyrmasymen árbir qazaqstandyq otbasyǵa qatysy bar «Pedagog mártebesi jaily» zań jobasy ázirlendi.
«Qazir bilim salasynda jarty millionnan astam qazaqstandyq jumys isteidi. Olardyń 81% áielder. Tamyz konferentsiiasynda el Prezidenti Qasym-Jomart Toqaev ultymyzdyń básekege qabilettiligin arttyrý úshin muǵalim mártebesi biik deńgeige kóterilý kerek dep atap ótti. Jyl saiyn diplomdy mamandardyń sany artqanymen, pedagogtarǵa degen suranys azaimai otyr. Pedagog mamandardyń 35% basqa salaǵa ketip qalady. Bilikti muǵalimderdi mektepterge, ásirese, aýyldyq jerlerge tartý mehanizmi mardymdy jumys istemei tur. Bul sheshýge tiisti máselelerdiń bir bóligi ǵana», - dedi Baýyrjan Baibek.
Onyń aitýynsha, zań jobasyn ázirleý úshin ǵalymdar, muǵalimder, zańgerler, depýtattar jáne bilim salasy kásipodaqtarynyń ókilderinen quralǵan jumys toby jasaqtalǵan. Jyl boiy elimizde kóptegen kezdesýler ótkizildi, 8600-den asa usynys tústi.
«Partiia músheleriniń 30% - pedagogtar, sondyqtan «Nur Otan» zań jobasynyń ázirlený barysyn erekshe baqylaýda ustap otyr. Pedagog quqyǵyn keńeitý jáne onyń áleýmettik mártebesin jaqsartý máselesi bar. Áńgime, bárinen buryn, muǵalimderdi materialdyq turǵydan jáne basqa da yntalandyrý jaǵdailaryn týǵyzý, qajetsiz tekserýlerden aryltyp, shyǵarmashyl jáne nátijeli jumys isteýge jaǵdai jasaý týraly bolyp otyr. Qazirgi ýaqytta ázirlenip jatqan zań jobasy boiynsha taiaý 5 jylda jalaqyny ósirý, ustazdyq sheberlik pen synyp jetekshiligi úshin ústemaqy qosý, eńbek demalysy men basqa da yntalandyrýlardy qamtityn 5,2 trillion teńge bólinedi dep mólsherlenýde. Bunyń barlyǵy Elbasy men Prezident saiasatynyń sabaqtastyǵynyń nátijesi», - dep atap ótti Baýyrjan Baibek.
Partiia tóraǵasynyń birinshi orynbasary Májilistegi «Nur Otan»» partiiasy fraktsiiasy depýtattarynyń jáne jumys tobynyń zań jobasyn talqylaý qorytyndysy boiynsha qosymsha usynystar engizilgenin jetkizdi. Sondai-aq, oqý júktemesin 16 saǵatqa tómendetý, jer telimderin bólý jáne «Qazaqstannyń eńbek sińirgen ustazy» dárejesine ie bolǵandarǵa bir jolǵy 2000 AEK kólemindegi tólem tóleý jáne Prezidenttik olimpiadalar, respýblikalyq jáne halyqaralyq jarystardyń júldegerlerin daiyndaǵandary úshin 3 ailyq jalaqy berý jaily usynys aityldy.
Óz kezeginde bilim ministri Ashat Aimaǵambetov jańa zań jobasynda pedagog quqyǵyn qorǵaý týrasyndaǵy 10 jańa ustanym qarastyrylǵanyn habarlady. Muǵalimderdiń sapalyq quramyn arttyrý úshin magistr dárejesi barlarǵa 10 AEK kóleminde ústeme, balabaqshalarda eń aldymen oryn bólý jáne basqa da áleýmettik kómekter qarastyrylmaq.
Ashyq pikirtalasqa qatysýshylardyń barlyǵy jańa zań jobasy boiynsha ózderin qyzyqtyratyn saýaldardy qoia alatynyn aita ketýimiz kerek. Otyrys barysynda Shymkenttegi №1 mektep-gimnaziiasynyń biologiia pániniń oqytýshysy Alina Soloviova óz oiyn jetkizdi.
«Men qarapaiym mektep oqytýshysymyn. Men ata-analardyń bizden neni kútetinin bilemin. Kez kelgen ata-ana onyń balasyna túsinistikpen qarap, jaqsy kórgenimizdi qalaidy. Qoǵam muǵalimderdiń esep berýmen ainalyspai, balalarǵa durys mán bergenin jaqsy kóredi. Muǵalimderdi olimpiadada oryn alǵan oqýshylary úshin marapattaý jaiyna kelsek, »Daryn«, NZM siiaqty daryndy balalar oqityn mektepterdiń bar ekenin eskere ketken jón. Al meniń jai mekteptiń ózinde 143 jeńimpazym bar. Maqtanaiyn dep turǵan joqpyn, biraq osylardy dárejelerge bólý kerek siiaqty. Kimniń oqýshysy júieli túrde jeńimpaz bolyp júrse, solardy marapattaý kerek», - dedi ol.
Baýyrjan Baibek muǵalimniń usynysyn qoldady. Onyń aitýy boiynsha, osy tektes mektepterdiń arasynda saralaýdy engizý qajet.
«Aýyldy jerlerde nemese jaǵdaiy tómen aýdandardan osyndai jeńimpaz balalar az shyqpaidy. Bul erekshe baǵalaýǵa turarlyq. Bul ustazdardyń zor eńbegi. Jaqynda ǵana astana ákimimen birge eki jyl buryn ǵana jekemenshik basqarýǵa berilgen №54 mektep-litseige bardyq. Olar direktordyń kabinetin muǵalimder otyratyn bólme etip jasapty. Direktor bolsa óz kabinetin birinshi qabattaǵy kireberiske jaqyn etip shynydan jasatypty. Biz Altai Kólginov ekeýimiz barlyq memlekettik mektep direktorlaryn osyndai bastamaǵa shaqyratyn bolyp kelistik. Eger kim de kim osy ideiany qoldaityn bolsa, demek ózgerýge daiyn degen sóz. Kei mektep direktorlarynyń eshteńe ózgertkisi kelmei qashqaqtaityndary da qupiia emes. Ásirese, astanada, artynda tiregi bar direktorlar. Eger ár direktor áriptesterimen jumys istei bilse, muǵalimderin qorǵasa, kómektesse, solar utady. Muǵalim mártebesi - bul bizdiń elimizdiń bolashaǵynyń máselesi, bizdiń básekege qabilettiligimiz», - dep atap ótti Baýyrjan Baibek.
