Qazaqstan ustazdarynyń ulttyq biliktilik testileýi osy jyldyń sáýir aiynda bastalady. Bul týraly Bilim jáne ǵylym ministrliginiń apparattyq otyrysynda vitse-ministr Sholpan Karinova málim etti, dep habarlaidy "Ult aqparat".
«Elimizde 2018 jyly muǵalimderdi attestattaýdyń jańa júiesi engizilgeni barshaǵa málim. «Pedagog mártebesi týraly» zań aiasynda buiryqqa ózgerister engiziledi. Endi barlyq bilim berý uiymdarynyń, sonyń ishinde mektepke deiingi uiymdardyń, mektepterdiń, tehnikalyq jáne kásiptik bilim berý uiymdarynyń, qosymsha bilim berý uiymdarynyń muǵalimderi osy erejeler negizinde attestattaýdan ótedi. Atalǵan baǵyttar boiynsha qarjylandyrý barlyq sanattar úshin jalaqyny 30-dan 50 paiyzǵa deiin kóterý kezinde muǵalimderdiń sanatyn jaqsartý maqsatynda respýblikalyq biýdjetten bólinedi», - dedi Sholpan Karinova.
Vitse-ministr sonymen qatar 2020 jylǵa deiin sanattar tek mektep pedagogtaryna berilip kelse, qazirgi tańda mektepke deiingi, orta, tehnikalyq jáne kásiptik bilim berý salasyndaǵy muǵalimderdiń bári de testen ótýge múmkindik alǵanyn jetkizdi. Onyń aitýynsha, biyldan bastap muǵalimder biliktilik testinen óte alady.
«2019 jyldyń qarasha-jeltoqsan ailarynda birinshi ret kompiýterlik formatta test ótkizdik. Biyl da testileýdi kompiýterlik formatta ótkizý josparlanyp otyr. Ár oqytýshyǵa jeke derbes kompiýter beriledi. Suraqtardyń bazasy da bar. Búgingi kúni test jańartyldy. Muǵalimderdiń jalaqysy 1 qyrkúiekten bastap ósýi úshin osy jyldyń sáýirinen bastap biliktilik testileýinen ótý múmkindigi jolǵa qoiylady», - dedi Sholpan Karinova.
