قازاقستان ۇستازدارىنىڭ ۇلتتىق بٸلٸكتٸلٸك تەستٸلەۋٸ وسى جىلدىڭ سەۋٸر ايىندا باستالادى. بۇل تۋرالى بٸلٸم جەنە عىلىم مينيسترلٸگٸنٸڭ اپپاراتتىق وتىرىسىندا ۆيتسە-مينيستر شولپان كارينوۆا مەلٸم ەتتٸ, دەپ حابارلايدى "ۇلت اقپارات".
«ەلٸمٸزدە 2018 جىلى مۇعالٸمدەردٸ اتتەستاتتاۋدىڭ جاڭا جٷيەسٸ ەنگٸزٸلگەنٸ بارشاعا مەلٸم. «پەداگوگ مەرتەبەسٸ تۋرالى» زاڭ اياسىندا بۇيرىققا ٶزگەرٸستەر ەنگٸزٸلەدٸ. ەندٸ بارلىق بٸلٸم بەرۋ ۇيىمدارىنىڭ, سونىڭ ٸشٸندە مەكتەپكە دەيٸنگٸ ۇيىمداردىڭ, مەكتەپتەردٸڭ, تەحنيكالىق جەنە كەسٸپتٸك بٸلٸم بەرۋ ۇيىمدارىنىڭ, قوسىمشا بٸلٸم بەرۋ ۇيىمدارىنىڭ مۇعالٸمدەرٸ وسى ەرەجەلەر نەگٸزٸندە اتتەستاتتاۋدان ٶتەدٸ. اتالعان باعىتتار بويىنشا قارجىلاندىرۋ بارلىق ساناتتار ٷشٸن جالاقىنى 30-دان 50 پايىزعا دەيٸن كٶتەرۋ كەزٸندە مۇعالٸمدەردٸڭ ساناتىن جاقسارتۋ ماقساتىندا رەسپۋبليكالىق بيۋدجەتتەن بٶلٸنەدٸ», - دەدٸ شولپان كارينوۆا.
ۆيتسە-مينيستر سونىمەن قاتار 2020 جىلعا دەيٸن ساناتتار تەك مەكتەپ پەداگوگتارىنا بەرٸلٸپ كەلسە, قازٸرگٸ تاڭدا مەكتەپكە دەيٸنگٸ, ورتا, تەحنيكالىق جەنە كەسٸپتٸك بٸلٸم بەرۋ سالاسىنداعى مۇعالٸمدەردٸڭ بەرٸ دە تەستەن ٶتۋگە مٷمكٸندٸك العانىن جەتكٸزدٸ. ونىڭ ايتۋىنشا, بيىلدان باستاپ مۇعالٸمدەر بٸلٸكتٸلٸك تەستٸنەن ٶتە الادى.
«2019 جىلدىڭ قاراشا-جەلتوقسان ايلارىندا بٸرٸنشٸ رەت كومپيۋتەرلٸك فورماتتا تەست ٶتكٸزدٸك. بيىل دا تەستٸلەۋدٸ كومپيۋتەرلٸك فورماتتا ٶتكٸزۋ جوسپارلانىپ وتىر. ەر وقىتۋشىعا جەكە دەربەس كومپيۋتەر بەرٸلەدٸ. سۇراقتاردىڭ بازاسى دا بار. بٷگٸنگٸ كٷنٸ تەست جاڭارتىلدى. مۇعالٸمدەردٸڭ جالاقىسى 1 قىركٷيەكتەن باستاپ ٶسۋٸ ٷشٸن وسى جىلدىڭ سەۋٸرٸنەن باستاپ بٸلٸكتٸلٸك تەستٸلەۋٸنەن ٶتۋ مٷمكٸندٸگٸ جولعا قويىلادى», - دەدٸ شولپان كارينوۆا.
