8 qarasha kúni ótken Senat otyrysynda depýtat Birǵanym ÁITIMOVA Qazaqstan Respýblikasynyń Premer-Ministri B.Á.Saǵyntaevtyń atyna depýtattyq saýal joldady.
QAZAQSTAN RESPÝBLIKASYNYŃ
PREMER-MINISTRI
B.Á. SAǴYNTAEVQA
Qurmetti Baqytjan Ábdiruly!
Bizdiń depýtattyq saýal joldaýymyzǵa tómendegidei máseleler negiz bolyp otyr.
Elimizdiń turaqty damýy halyqtyń ómir súrý deńgeiin odan ári arttyrýǵa úlken úmit uialatady. Qazirgi ýaqytta halqymyzdyń sany
18 million adamnan asyp, ómir súrý uzaqtyǵy 72,5 jasqa jetti.
Qazaqstan Respýblikasynyń Prezidenti osy jyldyń 5 qazandaǵy Qazaqstan halqyna jyl saiynǵy Joldaýynda ómir súrý deńgeii ósýiniń negizgi quramdas bóligi retinde ómir súrýdiń sapasyn arttyrý máselesine basa nazar aýdardy.
Prezidentimiz bilim berý, densaýlyq saqtaý, turǵyn úidiń sapasy men qoljetimdiligi máseleleri, jaily ári qaýipsiz ómir súrý máseleleri - árbir qazaqstandyq otbasyna qatysty bolýy kerek ekenin atap kórsetti.
Pedagog qoǵamnyń «qozǵaltqyshy», qoǵamdyq progrestiń katalizatory jáne údetkish rólin atqarady.
Dáriger adamdy týǵan kezde qarsy alady, árdaiym aýyrǵan ýaqytynda janynda jáne ony ómir jolynyń sońynda shyǵaryp salady.
Pedagogtar men dárigerlerdiń qoǵamdaǵy mańyzdy missiiacyna qaramastan, búgingi tańda olardyń kóbiniń ómir súrý sapasy men turǵyn úi jaǵdaiy tómen deńgeide qalyp otyr nemese óz baspanalary múldem joq. Mundai jaǵdaidy túbegeili ózgertýimiz qajet.
Elimizde muǵalimderdiń jalpy sany 285 996 adamdy, onyń ishinde
qalada – 114 627 adamdy, al aýyldyq jerlerde – 171 369 adamdy quraidy.
Densaýlyq saqtaý uiymdarynda jalpy alǵanda 247 myńnan astam meditsina qyzmetkeri jumys isteidi. Olardyń 72 134-i – dárigerler, al 175 246-sy – orta meditsina qyzmetkerleri. Sonyń ishinde tikelei densaýlyq saqtaý júiesinde – 56 570 dáriger, 152 591 orta meditsina qyzmetkerleri jumys isteidi.
Jalpy respýblikamyzda jarty millionnan astam muǵalimder men meditsina qyzmetkerleri jumys isteidi, bul halyqtyń jalpy sanynyń 3% paiyzyn nemese elimizdiń ekonomikalyq belsendi halqynyń 6% paiyzyn quraidy.
2018 jyldyń 8 mamyrynda «Nurly jer» baǵdarlamasynyń iske asyrylýyn talqylaý barysynda Senat depýtattary Úkimetke dárigerler men muǵalimderdi qoljetimdi turǵyn úimen qamtamasyz etý boiynsha jeke baǵdarlama ázirleýdi usyndy.
«Qazaqstan ipotekalyq kompaniiasy» aktsionerlik qoǵamy osyndai baǵdarlamanyń jobasyn daiyndady (qosa berilip otyr).
Muǵalimder men dárigerlerdi turǵyn úimen qamtamasyz etý máselesin sheshý joldarynyń biri retinde áskeri qyzmetshilerge arnalǵan turǵyn úi baǵdarlamasyna uqsas Qazaqstannyń turǵyn úi qurylys jinaq banki iske asyryp jatqan mehanizmdi qoldaný qajet dep esepteimiz.
Ózińizge málim, 2017 jylǵy 12 jeltoqsanda áskeri qyzmetshilerdi turǵyn úimen qamtamasyz etý júiesin jetildirý maqsatynda «Qazaqstan Respýblikasynyń keibir zańnamalyq aktilerine turǵyn úi qatynastary máseleleri boiynsha ózgerister men tolyqtyrýlar engizý týraly» Qazaqstan Respýblikasynyń Zańy qabyldandy.
Qurmetti Baqytjan Ábdiruly, joǵaryda aitylǵandardy eskere otyryp, Qazaqstan Respýblikasy Prezidentiniń halyqty qoljetimdi turǵyn úimen qamtamasyz etý jónindegi tapsyrmalaryn oryndaý úshin, Sizden muǵalimder men dárigerlerdiń turǵyn úi máselelerin sheshý boiynsha jańa algoritmdi qarastyratyn Qazaqstan Respýblikasy Zańynyń jobasyn ázirleý jóninde tiisti memlekettik organdarǵa tapsyrma berýińizdi suraimyz.
«Qazaqstan Respýblikasynyń Parlamenti jáne onyń depýtattarynyń mártebesi týraly» Qazaqstan Respýblikasy Konstitýtsiialyq Zańynyń
27-babyna sáikes depýtattyq saýaldy qaraý nátijeleri týraly zańda belgilengen merzimde jazbasha jaýap berý qajettiligin atap kórsetemiz.
Qurmetpen, Senat depýtattary:
B. ÁITIMOVA
D. NAZARBAEVA
