1 qyrkúiekten bastap Qazaqstan ulttyq arnasynan «Eki juldyz» jobasy qaita efirge shyǵady, dep habarlaidy "Ult aqparat" telearnanyń baspasóz qyzmetine silteme jasap.
«Eki juldyz» shoýynda tanymal ánshiler men ózge salanyń mamandary án aityp qana qoimai, eń myqty jup retinde jeńiske jetýge talpynady. Qatysýshylar arasynda belgili sportshylar, kino jáne teatr akterleri, depýtat, ustaz, aitysker aqyn, kásipker men telejúrgizýshiler bar.
Atap aitqanda, jobadan akter, QR Halyq ártisi Doshan Joljaqsynov, QR Halyq ártisi, teatr jáne kino akteri Tuńǵyshbai Jamanqulov, QR Parlamenti Májilisiniń depýtaty Merýert Qazbekova, aitysker aqyn Didar Qamiev, telejúrgizýshiler Áikerim Esenáli, Qaragóz Súleimenova, kásipker Larion Lian, boksshy, Olimpiada júldegeri Ádilbek Niiazymbetov, taekvondoshy Sevda Alieva, qazaq tili pániniń muǵalimi Sergei Vorontsov, teatr jáne kino akterleri Qairat Ádilgerei, Mereke Qalbaeva, Gúlbahram Ahat, Dáýren Aidarqulov, Táýekel Músilim, Dariǵa Badyqova jáne Berik Tursynbekovtyń ónerin tamashalaýǵa bolady.
Olarmen juptasyp, básekege túsetin estrada juldyzdary qatarynda Ushqyn Jamalbek, Aqbota Kerimbekova, Aqbota Nur, Jiger Aýypbaev, Qýandyq Rahym, Nurbolat Abdýllin, Serik Ibragimov, Zarina Altynbaeva, Jubanysh Jeksenuly, Aigúl Imanbaeva, Saltanat Baqaeva, Ǵazizhan Shekerbekov, Jeńis Ysqaqova, Baljan Bidash pen «Slavian bazarynan» júldemen oralǵan Ernar Sadyrbaev bar.
Ár kezeń túrli taqyryptarǵa bólingen - ulttyq mýzykadaǵy airyqsha tulǵa Shámshi Qaldaiaqovtyń jáne ańyzǵa ainalǵan «Dos-Muqasan» ansambliniń ánderi «Eki juldyz» sahnasynda shyrqalady.
«Qatysýshylardyń óneri úsh adamnan quralǵan qazylar alqasynyń jáne zalda otyrǵan kórermenniń arnaiy mobildi qosymsha arqyly bergen daýys sanymen baǵalanady. Qazylar alqasy men kórermenniń daýysy 50/50 paiyz quqyqqa ie. Ár baǵdarlama saiyn eń az qoldaýǵa ie bolǵan bir jup jobamen qosh aitysady. Qazylar alqasynyń turaqty múshesi - Qazaqstannyń Eńbek sińirgen qairatkeri, ánshi Tolqyn Zabirova», - delingen telearnanyń resmi habarlamada.
Baǵdarlama 21 qyrkúiekten bastap ár senbi saiyn 21:00-de kórsetiledi.
Eske sala ketsek, qyrkúiek aiynda ulttyq arnanyń 61-shi maýsymy ashylǵan bolatyn. Jańa maýsymda Qazaqstan arnasynan 14 jańa joba efirge shyǵady. Osyǵan deiin kórermen yqylasyna bólenip úlgergen 10 baǵdarlama jańasha formatta qaita usynyldy.
