Ózbekstannyń halyq bilimi ministrligi Tashkent oblysynyń Bekabad qalasyndaǵy №5 mekteptiń direktory D. Babamýratova jumystan shyǵarylǵanyn habarlady. Bul mektepte muǵalim birinshi synyptyń tórt oqýshysynyń mańdaiyna "eki" qoiyp bergen, dep jazdy centralasian.org.
Buǵan deiin habarlanǵandai, Bekabad qalalyq prokýratýrasy men Tashkent oblystyq halyqqa bilim berý basqarmasy tórt oqýshynyń mańdaiyna eki qoiǵan muǵalimniń isin teksergen. Jazalanǵan balalardyń sýretteri birneshe kún buryn áleýmettik jelilerde taraǵan.
Tashkent oblystyq halyqqa bilim berý basqarmasynyń habarlaýynsha, muǵalim tártipsiz jáne úlgerimi tómen oqýshylardyń mańdaiyna "eki" salyp bergen. Muǵalimniń bul áreketin prokýratýra "psihologiialyq azaptaý" dep baǵalaǵan.
Sol sebepti mektep direktorymen eńbek kelisimsharty úzilgen. Buǵan qosa, óz qyzmetterine jaýapsyz qaraǵan direktordyń eki orynbasary jumystan shyǵaryldy. Oqýshylardy mazaq qylǵany úshin bastaýysh synyptardyń eki muǵalimi jumysynan aiyryldy.
Tashkent oblystyq halyqqa bilim berý basqarmasy basshysynyń orynbasary Shýkýr Býrhanov muǵalimderdiń áreketterinen zardap shekken balalardyń ata-analarymen kezdesip, olardan keshirim surady. Basqarma barlyq bilim berý mekemesinde talqylaý júrgizdi. Halyq bilim ministrligi oqýshylardyń quqyqtaryn buzǵandar qatań jazalanatynyn málimdedi.
