Foto: Undrey / Shutterstock
Óskemen qalasyndaǵy №8 arnaiy mektep-internatta bolǵan muǵalim men oqýshynyń arasyndaǵy kikiljińge bailanysty tekserý júrgizildi, dep habarlaidy QazAqparat.
Qala turǵyny №8 arnaiy mektep-internatynda 9-synypta oqityn qyzyn muǵalimniń uryp-soqqanyn aityp, politsiiaǵa shaǵymdandy. Budan bólek, ol dál sol mektepte bilim alatyn ulynyń mektep aýmaǵynda ustazdardyń qaraýynsyz júrgende qolyn syndyryp alǵanyn jetkizgen.
Osyǵan bailanysty Shyǵys Qazaqstan oblystyq bilim basqarmasy resmi túsinikteme berdi.
«Muǵalimniń qyzdy soqqany rastalmady. Sot-meditsinalyq saraptama nátijesinde jasóspirimnen eshqandai jaraqat tabylmady. Beinebaqylaý kameralarynyń jazbasynan kóringendei, muǵalim balaǵa eskertý jasady, biraq qyz esh jaýap bermei, ary qarai júgirip ketken. Sol kezde pedagog onyń sońyna túsip, burymynan ustady. Al oqýshy jaýap retinde muǵalimniń shashynan ustaǵan», - deidi basqarma basshysynyń orynbasary Dinara Shaýhina.
Osy jaǵdaidan keiin muǵalimge qatań sógis berilgen.
Ekinshi oqiǵaǵa qatysty da tekserý júrgizildi. Belgili bolǵandai, oqýshy doppen oinap júrgen kezde qulap, jaraqat alǵan.
«Mektepke birden jedel járdem qyzmetkerleri shaqyrtyldy. Olar balany qaladaǵy Ana men bala ortalyǵyna jetkizgen. Eshkimniń kinási joq ekenin balanyń ózi de rastady», - deidi Shaýhina.
