Foto: Semey-news.kz
Semeide 21 jeltoqsanda, jańa jyldyq shyrshany bezendir barysynda oqys oqiǵa boldy. Bezendirýge muǵalimder tartylyp, saldarynan olardyń biri jaraqat alǵan. TikTok qoldanýshysy @eldanamukanova málimdegendei, qazaq tili men ádebieti muǵalimi 4-5 metr jerden qulap, aýyr jaraqattarmen qazir reanimatsiiada jatyr.
Eldana Muqanova muǵalimderdi jumystan tys ýaqytta qoǵamdyq sharalarǵa atsalysýǵa shaqyrý qanshalyqty zańdy dep suraq qoiady.
"Árkim óz isine jaýapty bolyp, jumysyn atqarýy kerek. Muǵalim sabaǵyn bergen soń úiine, bala-shaǵasyna oralýy kerek. Nelikten ol jumystan tys ýaqytynda taǵy da ákimshiliktiń jumysyn istep, qaýipsizdik sharalary qamtamasyz etilmegen jaǵdaida aqysyz eńbek etýi kerek", - deidi ol.
Belgili bolǵandai, muǵalimniń aty-jóni Qýat Aitqali. Jasy 49-da. Qazaq tili men ádebietiniń muǵalimi óz óńirinde jazýshylyq qyrymen de tanylǵan elge syily azamat.
QR Oqý-aǵartý ministri Ǵani Beisembaev bul jaǵdaiǵa birden ún qatyp, mundai sharalardyń QR «Pedagog mártebesi týraly» zańyna qatań túrde qaishy keletinin atap ótti. Bul zań muǵalimderdi kásibi qyzmetimen bailanysy joq jumystarǵa tartýǵa tyiym salady.
«Biz oblys basshylyǵynyń bul jaǵdai boiynsha obektivti tergeý júrgizip, bolashaqta mundai oqiǵalardy boldyrmaý úshin tiisti sharalar qabyldaitynyna úmittenemiz. Barlyq bilim bólimderi men basqarma basshylaryna QR «Pedagog mártebesi týraly» zań normalaryn qatań saqtaý qajettigin taǵy da eske salamyn. Qýat Aitqalievtyń otbasyna shynaiy qoldaý bildiremin jáne oǵan tez saýyǵyp ketýin tileimin», — dep jazdy ministr.
Ministr zardap shekken muǵalimge qajetti meditsinalyq kómek kórsetilip jatqanyn jáne oqiǵanyń «erekshe baqylaýda» ekenin qosty.
Abai oblysynyń bilim basqarmasy da bul oqiǵaǵa qatysty birden túsinikteme berdi.
«Abai oblysynyń bilim basqarmasy oqiǵa boiynsha barlyq mán-jaidy anyqtaý úshin qyzmettik tekseris bastady. Zańnamany buzýǵa jol bergen jaýapty tulǵalar jaýapkershilikke tartylady», — delingen habarlamada.
Oqiǵaǵa qatysty pikir bildirgen Májilis depýtaty, burynǵy Bilim jáne ǵylym ministri Ashat Aimaǵambetov bul jaǵdaidy jai ǵana qatelik dep qarastyrýǵa bolmaitynyn aitty.
«Jańa jyldyq shyrsha ornatý, kóshe tazalaý, basqa da naýqandarǵa májbúrlep tartý siiaqty eski “dástúrlerden” birjola bas tartýymyz kerek. Bul – zańdy óreskel buzý. Naqty sharalar qajet. Oblys basshylyǵy bul jaǵdaidy muqiiat tergep, kinálilerdi jazalaýy tiis. Ministrlik muǵalimderdi tikelei mindetterine qatysy joq jumystarǵa tartýdy toqtatý úshin baqylaýdy kúsheitýi qajet. Bilim basqarmalary men mektep ákimshilikteri muǵalimderdiń quqyqtaryn qatań saqtaý boiynsha óz mindetterin oryndaýy tiis. Zardap shekken áriptesime tezirek saýyǵyp ketýin tileimin. Ministrliktiń bul máseleni baqylaýǵa alǵany qýantady», — dedi Ashat Aimaǵambetov.
Osy ýaqytta Semei ákimdigi bas shyrshanyń shamdaryn jaǵý saltanaty 25 jeltoqsanǵa aýystyrylǵanyn habarlady. 2019 jyly satyp alynǵan shyrsha qatty jelden zaqymdanǵandyqtan, biyl bas alańda biiktigi 20 metrlik jańa shyrsha ornatylǵan bolatyn.
23 jeltoqsanda Semei ákimi Nurbol Nursaǵatov qyzmetinen ketkeni belgili boldy. Ol Instagram paraqshasynda jazba qaldyryp, búgin sońǵy jumys kúni ekenin habarlady. Alaida sheneýnik otstavkaǵa ketýine ne sebep bolǵanyn naqtylamady.
"Búgin meniń qala ákimi retindegi sońǵy jumys kúnim. Oblys ortalyǵy mártebesin uzaq jyldardan keiin qaita alǵan qasietti Semei qalasynyń ákimi bolý men úshin úlken qurmet ári jaýapkershilik boldy. Eki jarym jyl boiy men jáne ákimdik qyzmetkerleri sizdermen birge qalamyzdy jaily ári kórikti etý úshin kún saiyn jumys istedik. Árine, qiyndyqtar boldy, óitkeni bardy qalpyna keltirý jańa nárse salýdan áldeqaida kúrdeli", - dep jazdy Nursaǵatov.
