Almaty qalalyq politsiia departamenti bastyǵynyń orynbasary Rýstam Ábdirahmanov Mudaraban Capital qarjy piramidasyna qatysty qozǵalǵan is jaiynda túsinik berdi, dep habarlaidy QazAqparat.
«Qazirgi tańda qylmystyq protseske 14 adam tartyldy, olarǵa Qylmys kodeksiniń 217-baby 3-bólimi boiynsha aiyp taǵylǵan. On kúdikti qamaýda otyr, ekeýine halyqaralyq izdeý jariialandy, bireýi kepilmen bosatyldy, bireýi eshqaida ketpeitini jaily qolhat berdi», - deidi Rýstam Ábdirahmanov.
Sonymen qatar, ol politsiia blogerlerdi qamaýǵa alý arqyly, negizgi kúdiktilerdi isten jaltartpaq degen aqparatty joqqa shyǵardy.
«Qarjy piramidasynyń salymshysy Baǵila Dosmaiylova meni tikelei aiyptady. Onyń aitýynsha, men «isti jabýǵa asyǵyp otyr ekenmin». 14 adam kúdikke ilingen qylmystyq isti men qalai jaýyp tastaimyn? Aita keteiin, Dosmaiylova naýryz aiynyń sońynda Bas prokýratýranyń aldyna jalǵyz adamdyq piket ótkizdi. Qolyndaǵy plakatta «Meiirjandy qamańdar» dep jazylǵan. Keshe Dosmaiylovanyń blogerlerge qatysty pikiri ózgerdi. Onyń sebebin bilmeimin. Ony biz teksermeimiz. Óitkeni, ol kisi bizde jábirlenýshi bolyp tanylǵan. Onyń ústine aýrýhanada jatyr. Múmkin aqshasyn qaitaryp alǵan bolar», - dedi ol.
Aita keteiik, 11 sáýir kúni Baǵila Dosmaiylova astanadaǵy Ishki ister ministrligi ǵimaratynyń aldynda ózin órtep jibergen bolatyn.
19 sáýir kúni Almatyda «Mudaraban Capital» qarjy piramidasynyń 4 uiymdastyrýshysy qamaýǵa alynǵany týraly jazǵanbyz.
Keiin tanymal vainerler Meiirjan Tórebaev pen Meiirhan Sherniiazov 10 táýlikke qamaldy.
