Jambyl oblysy Moiynqum aýdany Qarabóget aýylynan 50 shaqyrym qashyqtyqta Moiynqum orman jáne janýarlar dúniesin qorǵaý mekemesiniń aýmaǵynda qumdy jerde qurǵaq shóp pen sekseýil janyp jatyr. Órt sóndirýshiler osymen tórtinshi kún tilsiz jaýmen arpalysýda, dep habarlaidy "Ult aqparat" tótenshe jaǵdailar komitetine silteme jasap.
Órtti sóndirýge TJD, «Moiynqum, Baizaq, Merki, Qosqudyq, Qordai jáne Jýaly orman jáne janýarlar dúniesin qorǵaý mekemeleri» KMM, Moiynqum aýdanynyń erikti órt sóndirý qurylymynan 233 adam jáne 50 tehnika, «Qazaviaormankúzeti» RMK MI-2 tikushaǵy jumyldyryldy.
21 shilde túndegi jaǵdai boiynsha órttiń aýmaǵy 34 myń gektarǵa jetti. Eldi mekenderge qaýip joq. Barlyq kúsh-quraldar qaraýyldaý jumysyn júrgizýde. Órt ornynda ekpini sekýndyna 10 metrge jetetin jel soǵyp tur, aýa temperatýrasy - +36 gradýs.
Aita keteiik, ótken táýlikte 33 tabiǵi órt oqiǵasy tirkeldi. Shyǵys Qazaqstan, Jambyl, Qaraǵandy jáne Túrkistan oblystaryndaǵy 13 tabiǵi órt TJK baqylaýynda, onda órtterdi joiý boiynsha sharalar qabyldanýda.
Budan basqa, ótken táýlikte Aqtóbe, Shyǵys Qazaqstan, Jambyl, Batys Qazaqstan, Qaraǵandy, Qostanai Pavlodar, Soltústik Qazaqstan oblystaryndaǵy tabiǵi órtter joiyldy. Atalǵan óńirlerde ot sharpyǵan aýmaqtyń jalpy aýdany 403 gektardy qurady.
