Moody's Qazaqstannyń reitingin Baa3-ten Baa2-ge deiin kóterdi, boljam «Turaqty». Reitingtiń kóterilýi Qazaqstannyń memlekettik qarjysy men kredittik beiininiń Baa2 reitinginiń deńgeii elderine sáikes keletin ornyqtylyqty kórsetýimen bailanysty.
El aktivterin paidalaný kólemi men tiimdiligi, memlekettik boryshtyń tómen deńgeii, sondai-aq Úkimettiń makroekonomikalyq turaqtylyqty qamtamasyz etý jónindegi sharalarynyń tiimdiligi reitingti arttyrýǵa múmkindik bergen faktorlarǵa ainaldy, dep habarlaidy "Ult aqparat" Úkimettiń resmi saityna silteme jasap.
Moody's kontrtsikldyq biýdjet saiasatyn júrgizý tiimdiligin oń baǵalady, ol 2020 jyly Qazaqstannyń naqty JIÓ-niń qysqarýyn shekteýge múmkindik bergen edi. Agenttik Qazaqstan ekonomikasy 2021 jyly 3,5-4%-ǵa jáne 2022 jyly 4-4,5%-ǵa ósedi dep kútýde. Moody's baǵalaýy boiynsha Qazaqstandaǵy jalǵasyp jatqan institýtsionaldyq jáne ekonomikalyq reformalar eldiń memlekettik basqarý júiesin nyǵaityp, investitsiialyq tartymdylyǵyn arttyra alady.
«Qazaqstan reitingi joǵarylaǵan álemdegi bes eldiń birine (qamtylǵan 144 eldiń ishinde) ainaldy. Biylǵy jyldyń basynan beri Moody's-tiń reitingtik áreketteriniń 15%-dan kemi reitingti kóterýmen nemese oń boljam jasaýmen bailanysty boldy»,-delingen habarlamada.
