«Qazgeologiia» UGK» AQ 18 ýchaskede geologiialyq barlaý jumystaryn júrgizip jatyr, dep habarlaidy "Ult aqparat".
QR Ekologiia, geologiia jáne tabiǵi resýrstar ministrliginiń aqparatyna sáikes, atalǵan ýchaskelerdiń beseýi Jezqazǵan, Sátbaev jáne Altai monoqalalarynyń mańynda ornalasqan. Máselen, Qaraǵandy oblysynda Qaiyndy ýchaskesinde aýmaǵy 3835 sharshy shaqyrym Segizbai-Kólde 1430 sharshy shaqyrym, Úshshoqyda 515,5 sharshy shaqyrym bolatyn izdestirý jumystary boiynsha úsh joba iske asyrylýda. Ýchaskeler Jezqazǵan jáne Sátbaev qalalarynan 100 shaqyrym qashyqtyqta ornalasqan. Jezqazǵan kásipornynyń shikizat bazasyn tolyqtyrý osy óńirdiń damýyna jańa serpin beredi. Shyǵys Qazaqstan oblysynda Altai aýdanyna qarasty Revniýshin alańynda altyn-polimetall ken oryndaryn anyqtaý úshin iri masshtabty izdestirý jumystaryn júrgizilip jatyr.
«Izdestirý jumystarynyń materialdarymen ýchaskelerdiń tiisti masshtabtaǵy geologiialyq kartasy, geofizikalyq jáne geohimiialyq zertteýler nátijeleriniń kartalary jasalady. Irilendirilgen kórsetkishter boiynsha anyqtalǵan nysandarǵa geologiialyq-ekonomikalyq baǵalaý jáne odan ári geologiialyq-barlaý jumystary boiynsha usynymdar beriledi. Biyl nysandarda dalalyq, zerthanalyq jáne kameraldyq jumystar jalǵastyrylady. Olardyń nátijeleri boiynsha zertteletin aýmaqtardyń perspektivalaryna túpkilikti baǵa beriledi», - dep atap ótedi ministrlikten.
Vedomstvo málimetinshe, ýchaskelerdi geologiialyq zertteý jáne izdestirý protsesine jerdi qashyqtyqtan zondtaý, geofizikalyq, burǵylaý, taý-ken jumystary, zerthanalyq-saraptamalyq zertteýler jáne materialdardy kameraldyq óńdeý kiredi.
