Memleket basshysy Qasym-Jomart Kemelulynyń atyna Mońǵoliia jerindegi qandastarymyzdyń alǵysyn arqalaǵan haty kelip tústi. Bul týraly QR Prezidentiniń baspasóz hatshysy Berik Ýáli jelidegi paraqshasynda jazdy.
Memleket basshysy Qasym-Jomart Kemelulynyń atyna Mońǵoliia jerindegi qandastarymyzdyń alǵysyn arqalaǵan haty kelip tústi
Hatta qandastarymyz osynaý qiyn qystaý zamanda Qazaqstanǵa bilim alý úshin kelgen qarakózderge qamqorlyq kórsetip, barlyq jaǵdai jasap otyrǵan memleketimizge, osyndai jaǵdaidyń jasalýyna pármen berip, baqylaýda ustap otyrǵan Prezidentke rizashylyqtaryn bildirgen.
«Sizge qiyrdaǵy Mońǵoliia memleketinde meken etken qazaq qandastaryńyzdyń atynan duǵai sálem! Qyzmetińizge sáttilik pen tabys tileimiz. Qazaqstannyń abyroiy arta bersin! Álemdi jailaǵan myna indet tezirek ketip, aqjarylqap ýaqyt bastalsyn dep, Jaratqannan suraimyz», - dep bastalypty qandastarymyzdyń haty.
Budan ary Mońǵoliiadaǵy indetpen kúres sharalaryn aita kelip:
«Osy shekaralar jabylyp, ushaq ushpai, kólik júrmei qalǵan qiyn kezde bizdiń biraz oqýshy balamyz Qazaqstan Respýblikasynda qalyp qoidy. Biz buǵan áý basta qatty alańdadyq. Tipti, ýaiymdap, ábirjigen kezimiz de boldy.
Alaida, bunymyz beker bolyp shyqty. Eń birinshiden, Prezident retinde Ózińizdiń qamqorlyǵyńyzdyń arqasynda, ekinshiden, Bilim jáne ǵylym ministrligi men L.N.Gýmilev atyndaǵy Eýraziia ulttyq ýniversitetiniń kómegimen Qazaqstanǵa bilim izdep barǵan daiarlyq bólimindegi ul-qyzdarymyzdyń tamaǵy toq, kóilegi kók. Olar da el azamattarymen birdei karantin talaptaryn saqtap, aqparattyq tehnologiia júiesimen sabaqtaryn oqyp júr. Muny telefon arqyly kúnde bilip otyrmyz. Kóńilimiz ornyna tústi. «Shúkir!» dep otyrmyz.
Ardaqty Qasym-Jomart Kemeluly!
Bizdiń oqýdaǵy balalarymyz erteń stýdent, sodan keiin maman atanyp, Qazaqstan-Monǵoliia yntymaqtastyǵyn odan ári arttyrady dep senemiz.
Rizashylyq nietpen, L.N.Gýmilev atyndaǵy Eýraziia ulttyq ýniversitetiniń daiarlyq bóliminde oqyp jatqan Mońǵol Ulysy oqýshylarynyń ata-analary», - dep, hattyń astyna 13 ata-ana qol qoiypty.
