Oblystyq kitaphanada QazSSR-niń halyq ártisi Rústembek Omarovtyń 100 jyldyǵyna arnalǵan «Jastyq shaq» atty I halyqaralyq dirijerler sherýiniń ótkizilýine bailanysty baspasóz máslihaty ótti, dep habarlaidy pavlodarnews.kz.
Jiynǵa Qazaqstannyń túkpir-túkpirinen jáne alys-jaqyn shet elderden arnaiy shaqyrylǵan dirijerler qatysty. Olardyń biri – kóptegen halyqaralyq baiqaýlardyń laýreaty, álemdik deńgeidegi mýzykant, solist, kompozitor, «Kúmis aǵash» iegeri Chinbat Orhonbaatar Ertis óńirinde ótetin festivalde búrkitshi qyz Aisholpanǵa arnaǵan týyndysynyń tusaýyn kesýdi josparlap otyrǵany týraly jańalyqpen bólisti.
«Qazaqstanǵa, Pavlodar óńirine alǵash ret kelgenime óte qýanyshtymyn. 2012 jyly Pavlodar qalasynyń orkestri Talǵat Kárimovpen birge Seýlde oqyǵan kezde tanysqan edik. Búgingi kezdesý sol dostyqtyń jalǵasy dese bolady. Erteń siyrdyń múiizinen jasalǵan mońǵol halqynyń úrmeli aspaby - ever-býree jáne qazaq halyq aspaptary orkestrimen óner kórsetemin», - deidi Chinbat Orhonbaatar.
Sondai-aq, klassikaǵa ainalǵan Montidyń Chardash degen shyǵarmasyn oinaimyn. Bul festivalge arnaiy aty álemge tanylǵan búrkitshi qyz Aisholpanǵa arnaǵan «Búrkitshi qyz» degen shyǵarmamdy jazǵan edim jáne sol tól týyndymdy kórermen qaýymǵa usynamyn.
Kompozitor Rústembek Omarovtyń shyǵarmashylyǵymen jaqsy tanys ekenin jáne halyq aspaptar orkestriniń qurylýy týraly biraz zerttegenin aitady. Óner iesi Japoniia, Koreia, Germaniia elderine shaqyrtý alǵan jáne Mendelson kontsertiniń qatarynan úsh bóliminde tarihta alǵash ever-býree - mońǵol ultyq aspabynda oinaǵan. Altai Respýblikasy memlekettik orkestriniń kórkemdik jetekshisimen birge kelgen 26 jastaǵy mýzykant Dobrynia Satin festivalde altai taqyryptarynda popýri jáne saltanatty «Altai» siýitasyn oryndaitynyn aitady. Avtory - Vladimir Konchev.
«Rústembek Omarov orkestri bizdi óte jaqsy qarsy aldy jáne olardyń Altai halqynyń mádenietimen tanysýǵa degen qyzyǵýshylyǵy zor. Álbette, biz kóne altai ánimen, ikili, amyrgy, topshýr, komys ulttyq aspaptarda oinaýdyń qupiiasymen bólisemiz. Barynsha ulttyq etnikalyq aspaptardy, mádenietimizdi, batyrlar epostarynan úzindi kórsetkimiz keledi»,- deidi Dobrynia Satin.
Budan basqa, festivalde Resei men Qyrǵyzstannyń, Mońǵoliia men Qazaqstannyń eńbek sińirgen qairatkerleri, mádeniet salasynyń úzdikteri Halyqaralyq konkýrstardyń laýreattary Vladimir Konchev, Baqyt Tilegenov, Janas Bekenturov, Áli Alpysbaev, Dáýren Glymov, Nazymbek Moldahmetov, Talǵat Kárimov, Erkin Nurymbetov, Nurlan Tókeiuly, Ásem Sembina óner kórsetedi. Eske sala keteiik, Mońǵoliiada qusbegilikpen ainalysatyn qazaq qyzy Aisholpan Nurǵaiyp jaily túsirilgen derekti film «Oskar» kinosyilyǵynyń short-paraqshasyna engen.
Ol osydan birneshe jyl buryn búrkitshiler arasynda uiymdastyrylǵan úlken jarysqa qatysqan soń tanymal bola bastaǵan.
