Mońǵoliia memleketi Halyqaralyq Túrki akademiiasynyń janynda baqylaýshy bolý usynysyn qarastyrady. Bul týraly elordada Altyn Orda memleketiniń 750 jyldyǵyna arnalǵan dóńgelek ústel otyrysynda Mońǵoliia Premer-ministriniń orynbasary Ólziisaihany Enhtúvshin málim etti, dep habarlaidy QazAqparat.
«Qazaqtar men mońǵoldar ejelden tarihi sabaqtastyǵy ortaq, bir-birimen tyǵyz bailanysta ómir súrip kelgen kórshi baýyrlas halyqtar. Sondyqtan bizdiń qarym-qatynasymyz óte tyǵyz bolýy kerek dep oilaimyn. Jalpy, ózara bailanystarymyz jaqsy qarqynmen júrip jatqanyna óte qýanyshtymyn. Qazaqstannyń jerinde Shyńǵys babamyzdyń urpaqtary ómir súrgen, sol kisiniń úlken uly Joshy hannyń kúmbezi osy jerde turǵanyn bilemiz. Soǵan bailanysty Altyn Ordanyń 750 jyldyǵyna orai aýqymdy jumystar atqarylyp, osy eskertkishti qorǵaý, týristik ortalyqqa ainaldyrý, álemge tanytý, sondai-aq bizdiń ortaq órkenietimizdi nasihattaý baǵytynda Qazaqstannyń istep jatqan jumystaryn bizdiń memleketimiz jan-jaqty tolyq qoldaidy. Qazaqstannyń bul bastamasyna óz basym súisinip otyrmyn», - dedi Ólziisaihany Enhtúvshin Halyqaralyq Túrki akademiiasynda ótken dóńgelek ústel otyrysynda.
Sonymen qatar ol 2020 jyl Tonykók eskertkishiniń 1300 jyldyǵyna arnalatynyn eske saldy.
Onyń sózine qaraǵanda, Mońǵoliiadaǵy Qaraqorymnyń 800 jyldyǵyn birlesip toilaý, osy sharalar arqyly mádenietti nasihattaý halyqtardyń týystyq bailanystaryn kúsheite túsedi.
«Aldaǵy jyldyń tamyz aiynda Qaraqorymnyń 800 jyldyǵyn atap ótýge jospar jasadyq. Bul salada Halyqaralyq Túrki akademiiasynyń múmkindigi zor, sebebi bir jaǵynan ǵylymi mekeme bolsa, ekinshi jaǵynan halyqaralyq uiym mártebesine ie. Sondyqtan osy bedeli zor akademiiamen birlese otyryp, bul baǵyttaǵy sharalardy qarqyndy júrgize alamyz dep oilaimyn. Halyqaralyq Túrki akademiiasy 2014 jyldan beri Mońǵoliianyń ǵylym akademiiasymen, ulttyq mýzeiimen, arheologiia institýtymen, arhiv basqarmasymen memorandým ornatyp, jaqsy jumystar atqarǵanyna rizashylyǵymyzdy bildiremiz», - dep atap ótti Mońǵoliia Premer-ministriniń orynbasary.
Osy oraida ol Mońǵoliia aýmaǵynda Qazaqstan ǵalymdary tarapynan júrgiziletin zertteýlerge qoldaý jasalyp kelgenin aitty.
Sondai-aq, QR Úkimet basshysynyń orynbasary Berdibek Saparbaevtyń Halyqaralyq Túrki akademiiasyna Mońǵoliianyń baqylaýshy bolýyna jasaǵan usynysyna óz pikirin bildirdi.
«Mońǵoliiany baqylaýshy etý týraly usynysqa orai arnaiy komissiia tobyn jasaqtap, elimizdiń zanamasy aiasynda tiisti sheshim jasaityn bolamyz. Jalpy, ǵalymdarymyzdyń eńbekteri tereń maǵynaly bolsyn, bul zertteýler elderimiz úshin oljaly bolsyn dep tileimin», - dedi Ólziisaihany Enhtúvshin.
